ಕಾಫಿಗೆ ಬಂಪರ್‌ ದರ, ರಫ್ತಿನಲ್ಲೂ ಭರ್ಜರಿ 29% ಏರಿಕೆ, 1 ಬಿಲಿಯನ್‌ ಡಾಲರ್‌ ದಾಟಿದ ಎಕ್ಸ್‌ಪೋರ್ಟ್‌

 

ಪ್ರಸಕ್ತ ಹಣಕಾಸು ವರ್ಷದಲ್ಲಿ ಭಾರತದ ಕಾಫಿ ರಫ್ತು ಬರೋಬ್ಬರಿ ಶೇಕಡಾ 29ರಷ್ಟು ಏರಿಕೆ ಕಂಡಿದೆ. ಭಾರತವು 2024ರ ಏಪ್ರಿಲ್‌ನಿಂದ ನವೆಂಬರ್‌ ತನಕ ರಫ್ತು ಮಾಡಿದ ಕಾಫಿಯ ಮೌಲ್ಯ 1,146.9 ಮಿಲಿಯನ್‌ ಡಾಲರ್‌ ಅಂದರೆ ಸುಮಾರು 9,800 ಕೋಟಿ ರೂಪಾಯಿ ಆಗಿದೆ. ಕಳೆದ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ 803.8 ಮಿಲಿಯನ್‌ ಡಾಲರ್‌ ಮೌಲ್ಯದ ಕಾಫಿಯನ್ನು ರಫ್ತು ಮಾಡಲಾಗಿತ್ತು ಎಂದು ಭಾರತೀಯ ಆರ್ಥಿಕತೆ ನಿಗಾ ಕೇಂದ್ರ ಹೇಳಿದೆ.

ಹೊಸದಿಲ್ಲಿ: ಪ್ರಸಕ್ತ ಹಣಕಾಸು ವರ್ಷದಲ್ಲಿ ಭಾರತದ ಕಾಫಿ ರಫ್ತು ಬರೋಬ್ಬರಿ ಶೇ. 29ರಷ್ಟು ಏರಿಕೆ ಕಂಡಿದೆ. ಭಾರತವು 2024ರ ಏಪ್ರಿಲ್‌ನಿಂದ ನವೆಂಬರ್‌ ತನಕ ರಫ್ತು ಮಾಡಿದ ಕಾಫಿಯ ಮೌಲ್ಯ 1,146.9 ಮಿಲಿಯನ್‌ ಡಾಲರ್‌ (ಸುಮಾರು 9,800 ಕೋಟಿ ರೂ.) ಆಗಿದೆ. ಕಳೆದ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ 803.8 ಮಿಲಿಯನ್‌ ಡಾಲರ್‌ (6,900 ಕೋಟಿ ರೂ.) ಮೌಲ್ಯದ ಕಾಫಿಯನ್ನು ರಫ್ತು ಮಾಡಲಾಗಿತ್ತು ಎಂದು ಭಾರತೀಯ ಆರ್ಥಿಕತೆ ನಿಗಾ ಕೇಂದ್ರ (ಸಿಎಂಐಇ) ಹೇಳಿದೆ.

ಜಾಗತಿಕ ಕಾಫಿ ಉತ್ಪಾದನೆಯಲ್ಲಿ ಶೇ. 40ರಷ್ಟು ಪಾಲನ್ನು ಹೊಂದಿರುವ ಬ್ರೆಜಿಲ್‌ನಲ್ಲಿ ಈ ವರ್ಷ ಪ್ರತಿಕೂಲ ಹವಾಮಾನದಿಂದ ಇಳುವರಿ ಪ್ರಮಾಣ ಗಣನೀಯವಾಗಿ ಕಡಿಮೆಯಾಗಿದೆ. ಕಾಫಿ ಉತ್ಪಾದನೆಯಲ್ಲಿ ಎರಡನೇ ಸ್ಥಾನದಲ್ಲಿರುವ ವಿಯೆಟ್ನಾಂನಲ್ಲೂ ಇಳುವರಿ ಕುಸಿತ ಕಂಡಿದೆ. ಹೀಗಾಗಿ ಸಹಜವಾಗಿಯೇ ಭಾರತದತ್ತ ಕಾಫಿ ಪ್ರಿಯ ದೇಶಗಳ ಕಣ್ಣು ಬಿದ್ದಿದೆ.

ಈ ಪರಿಸ್ಥಿತಿಯಿಂದ ಸಾಂಪ್ರದಾಯಿಕ ಚಹಾ ರಫ್ತು ಮಾಡುವ ಭಾರತಕ್ಕೆ ಕಾಫಿ ಮಾರುಕಟ್ಟೆಯಲ್ಲೂ ಪ್ರಾಬಲ್ಯ ಸ್ಥಾಪಿಸುವ ಅವಕಾಶ ಲಭಿಸಿದೆ. ಇದೇ ಮೊದಲ ಬಾರಿಗೆ ಈ ಹಣಕಾಸು ವರ್ಷದ ನವೆಂಬರ್‌ನಲ್ಲಿ ಒಟ್ಟು ಕಾಫಿ ರಫ್ತು ಮೌಲ್ಯ ನೂರು ಕೋಟಿ ಡಾಲರ್‌ ದಾಟಿದೆ ಎಂದು ಭಾರತೀಯ ಆರ್ಥಿಕತೆ ನಿಗಾ ಕೇಂದ್ರ ಹೇಳಿದೆ.

ಭಾರತದ ಕಾಫಿಗೆ ಫಿದಾ ಆಗಿರುವ ದೇಶಗಳು

ಐರೋಪ್ಯ ಒಕ್ಕೂಟದ ಕಾಫಿ ಪ್ರಿಯರಿಗೆ ಭಾರತದ ಕಾಫಿ ಅಚ್ಚುಮೆಚ್ಚು. ಒಟ್ಟು ರಫ್ತಿನಲ್ಲಿ ಇಟಲಿ, ಬೆಲ್ಜಿಯಂ ಮತ್ತು ಜರ್ಮನಿಯದು ಸಿಂಹಪಾಲು. ಭಾರತದಿಂದ ರಷ್ಯಾ, ಅಮೆರಿಕ ಮತ್ತು ಸಂಯುಕ್ತ ಅರಬ್‌ ಒಕ್ಕೂಟಕ್ಕೆ ಶೇ. 20ರಷ್ಟು ಕಾಫಿ ರಫ್ತಾಗಿದೆ.

ಕರ್ನಾಟಕ ನಂಬರ್‌ 1

ಭಾರತೀಯ ಕಾಫಿ ಮಂಡಳಿಯ ಅಂಕಿ - ಅಂಶಗಳ ಪ್ರಕಾರ, ಕರ್ನಾಟಕದ ಚಿಕ್ಕಮಗಳೂರು, ಕೊಡಗು ಮತ್ತು ಹಾಸನಗಳಲ್ಲಿ 2022 -23ರಲ್ಲಿ 2,48,020 ಮೆಟ್ರಿಕ್‌ ಟನ್‌ಗಳಷ್ಟು ಅರೇಬಿಕಾ ಮತ್ತು ರೊಬೊಸ್ಟಾ ಕಾಫಿಯನ್ನು ಉತ್ಪಾದಿಸಲಾಗಿದೆ. ಕೇರಳ 72,425 ಮೆಟ್ರಿಕ್‌ ಟನ್‌ ಉತ್ಪಾದನೆಯೊಂದಿಗೆ ಎರಡನೇ ಸ್ಥಾನದಲ್ಲಿದ್ದರೆ, ತಮಿಳುನಾಡು 18,700 ಮೆಟ್ರಿಕ್‌ ಟನ್‌ನೊಂದಿಗೆ ಕಾಫಿ ಉತ್ಪಾದನೆಯಲ್ಲಿ ಮೂರನೇ ಸ್ಥಾನದಲ್ಲಿದೆ.

ಉತ್ತಮ ದರ, ಬೆಳೆಗಾರರಿಗೆ ಸಂತಸ

ಕಳೆದ 25 ವರ್ಷದಿಂದ ನಷ್ಟದಲ್ಲಿದ್ದ ಕಾಫಿ ಉದ್ಯಮಕ್ಕೆ ಇತ್ತೀಚಿನ 3 ವರ್ಷದ ಅವಧಿಯಲ್ಲಿ ಶುಕ್ರದೆಸೆ ಖುಲಾಯಿಸಿದೆ ಅದರಲ್ಲೂ 2024ರಲ್ಲಿ ಅತ್ಯುತ್ತಮ ದರ ಇದೆ. ಕಾಫಿ ಧಾರಣೆ ಹಿಂದೆಂದಿಗಿಂತಲೂ ಈಗ ಏರಿಕೆ ಕಂಡಿರುವುದರಿಂದ ಮೊದಲ ಸುತ್ತಿನಲ್ಲಿ ಕೊಯ್ಲು ಮಾಡಿದ ಪಲ್ಪಿಂಗ್‌ ಆದ ಕಾಫಿಯನ್ನು ಬೆಳೆಗಾರರು ಆಗಿಂದಾಗ್ಗೆ ಮಾರುಕಟ್ಟೆಗೆ ಬಿಡುತ್ತಿದ್ದಾರೆ.

ಅರೆಬಿಕಾ ಪಾರ್ಚ್ಮೆಂಟ್‌ 50 ಕೆಜಿ ಚೀಲವೊಂದಕ್ಕೆ 21250 ರೂಪಾಯಿ, ಅರೆಬಿಕಾ ಚೆರಿ 12,040 ರೂಪಾಯಿ, ರೊಬಸ್ಟಾ ಪಾರ್ಚ್ಮೆಂಟ್‌ 19,500 ರೂಪಾಯಿ ಹಾಗೂ ರೊಬಸ್ಟಾ ಚೆರಿಗೆ 11,880 ರೂಪಾಯಿ ಧಾರಣೆ ಇದೆ.