ಪಾಟ್ನಾದಲ್ಲಿ ನೀಡಿದ್ದ ಹೇಳಿಕೆಗೆ ಬಿಜೆಪಿ ಲೇವಡಿ
ನವದೆಹಲಿ: ದೇಶದ ಸಂವಿಧಾನ ಸಾವಿರಾರುವರ್ಷಗಳಷ್ಟು ಹಳೆಯದು ಎಂದು ಹೇಳುವ ಮೂಲಕ ಲೋಕಸಭೆ ವಿಪಕ್ಷ ನಾಯಕ ರಾಹುಲ್ ಗಾಂಧಿ ಅವರು ನಗೆಪಾಟಲಿಗೀಡಾಗಿದ್ದಾರೆ.ಬಿಹಾರದ ಪಾಟ್ನಾದಲ್ಲಿ ಸೋಮವಾರ ಪಕ್ಷದ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ್ದ ಅವರು, “ದೇಶದ ಸಂವಿಧಾನ 1947ರಲ್ಲಿ ರಚಿಸಲಾಗಿದೆ ಎಂದು ಕೆಲವರು ಹೇಳುತ್ತಾರೆ. ಆದರೆ, ಅದನ್ನು 1000 ವರ್ಷಗಳ ಹಿಂದೆಯೇ ರಚಿಸಲಾಗಿದೆ. ಅದರಲ್ಲಿ ಬಿ.ಆರ್.ಅಂಬೇಡ್ಕರ್, ಮಹಾತ್ಮ ಗಾಂಧಿ, ಗುರು ನಾನಕ್, ಜವಾಹರ್ಲಾಲ್ ನೆಹರೂ ಮತ್ತು ಸಂತ ಕಬೀರ್ ಅವರ ಚಿಂತನೆಗಳು ಸೇರಿವೆ’ ಎಂದು ಹೇಳಿದ್ದರು.ಇಂಥ ಜ್ಞಾನವಿರುವ ವಿಪಕ್ಷ ನಾಯಕನನ್ನು ಹೊಂದಿರುವುದು ದೇಶಕ್ಕೇ ಅವಮಾನ ಎಂದು ಬಿಜೆಪಿ ಸಂಸದ ಸುಧಾಂಶು ತ್ರಿವೇದಿ ಟೀಕಿಸಿದ್ದಾರೆ. 1947ರಲ್ಲಿ ಸಂವಿಧಾನ ರಚನಾ ಸಭೆ ಸಂವಿಧಾನ ರಚಿಸುವ ಬಗ್ಗೆ ಸಭೆ ಆರಂಭಿಸಿತ್ತು. 1949 ನ.26ರಂದು ಸಂವಿಧಾನ ರಚನೆಯನ್ನು ಅಂತಿಮಪಡಿಸಲಾಯಿತು. ಈ ಕಾರಣಕ್ಕಾಗಿಯೇ ಪ್ರಧಾನಿ ಮೋದಿ ಪ್ರತಿ ವರ್ಷದ ನ.26ರಂದು ಸಂವಿಧಾನ ದಿನ ಎಂದು ಆಚರಿಸಲು ತೀರ್ಮಾನಿಸಿದ್ದಾರೆ ಎಂದರು. ಪಕ್ಷದ ಇತರ
ನಾಯಕರಾಗಿರುವ ಜೈವೀರ್ ಶೆಗ್ರಿಲ್, ಅಜಯ್ ಅಲೋಕ್ ಕೂಡ ರಾಹುಲ್ ಹೇಳಿಕೆಯನ್ನು ಟೀಕಿಸಿ, ವ್ಯಂಗ್ಯವಾಡಿದ್ದಾರೆ.
