ತುಳುನಾಡಿನ ನಾಗಾರಾಧನೆಯ ನಿಗೂಢ ಕಥಾಹಂದರವನ್ನು ಆಧರಿಸಿ, ಕುಟುಂಬ ಸಮೇತ ಕುಳಿತು ನೋಡಬಹುದಾದ ಅತ್ಯುತ್ತಮ ಸಿನಿಮಾವನ್ನು ನಿರ್ದೇಶಕ ನಿತಿನ್ ರೈ ಕುಕ್ಕುವಳ್ಳಿ ‘ಬನ’ ಚಿತ್ರದ ಮೂಲಕ ಕನ್ನಡಿಗರಿಗೆ ನೀಡಿದ್ದಾರೆ. ನೈಜ ಮಣ್ಣಿನ ಕಥೆಯೊಂದಿಗೆ ಸಾಗುವ ಈ ಸಿನಿಮಾ ಆರಂಭದಿಂದ ಕ್ಲೈಮ್ಯಾಕ್ಸ್ ತನಕವೂ ಹಲವು ಸಸ್ಪೆನ್ಸ್ ಹಾಗೂ ರೋಚಕ ತಿರುವುಗಳ ಮೂಲಕ ಪ್ರೇಕ್ಷಕರನ್ನು ಕೀಲಿಮಣೆಯಂತೆ ಹಿಡಿದಿಟ್ಟುಕೊಳ್ಳುವಲ್ಲಿ ಸಂಪೂರ್ಣ ಯಶಸ್ವಿಯಾಗಿದೆ. ಶಶಿಕುಮಾರ್ ರೈ ಬಾಲ್ಯೂಟ್ಟು ಅರ್ಪಣೆಯಲ್ಲಿ, ಈಶಿ ಪ್ರೊಡಕ್ಷನ್ ಬ್ಯಾನರ್ ಅಡಿಯಲ್ಲಿ ಮನೋಹರ ರೈ ವೈಪಾಲ ನಿರ್ಮಾಣದಲ್ಲಿ ಮೂಡಿಬಂದಿರುವ ಈ ಚಿತ್ರದ ಪ್ರೀಮಿಯರ್ ಶೋ ವೀಕ್ಷಿಸಿದ ಪ್ರೇಕ್ಷಕರು ಚಿತ್ರಕ್ಕೆ ಫುಲ್ ಮಾರ್ಕ್ಸ್ ನೀಡಿದ್ದಾರೆ.
ಕಥೆಯ ಹಂದರ ಮತ್ತು ಸಸ್ಪೆನ್ಸ್:ಮಧ್ಯರಾತ್ರಿ ಕಾಡಿನಲ್ಲಿ ಕೇಳಿಬರುವ ತಾನೇ ಜನಿಸಿದ ಮಗುವಿನ ಅಳುವಿನೊಂದಿಗೆ ತೆರೆದುಕೊಳ್ಳುವ ಕಥೆಯು ಪ್ರೇಕ್ಷಕರನ್ನು ಕೊನೆವರೆಗೂ ಚೇರ್ ತುದಿಯಲ್ಲಿ ಕೂರುವಂತೆ ಮಾಡುತ್ತದೆ. ರಕ್ತದ ಕಲೆಗಳ ಮಧ್ಯೆ ಸಿಕ್ಕ ಆ ಅನಾಥ ಮಗುವನ್ನು ಮನೆಗೆ ತಂದು ಬೆಳೆಸಿದ ಬಳಿಕ ಅಲ್ಲಿ ನಡೆಯುವ ವಿಚಿತ್ರ ಹಾಗೂ ಅನಾಹುತಗಳೇ ಚಿತ್ರದ ಹೈಲೈಟ್. ರಾತ್ರಿ ವೇಳೆ ಕಾಣಿಸಿಕೊಳ್ಳುವ ನಾಗರಹಾವು, ಮುಂಬೈನಿಂದ ಬಂದ ಅತಿಥಿಗೆ ಬರುವ ನಾಗ ಸಂಪಿಗೆಯ ಪರಿಮಳ, ಸದ್ದಿಲ್ಲದೆ ಓಡಾಡುವ ಮಕ್ಕಳ ಸೈಕಲ್ ಮತ್ತು ಅಚ್ಚರಿಯ ಘಟನೆಗಳು ಪ್ರೇಕ್ಷಕರನ್ನು ಬೆಚ್ಚಿಬೀಳಿಸುತ್ತವೆ.ಯಾವುದೇ ಗ್ರಾಫಿಕ್ಸ್ ಬಳಸದೆ ಕೇವಲ ಒಂದು ಮಗುವಿನ ಮೂಲಕ ತುಳುನಾಡಿನ ನಾಗಾರಾಧನೆಯ ಮಹಿಮೆಯನ್ನು ನಿರ್ದೇಶಕರು ಬಹಳ ಆಕರ್ಷಕವಾಗಿ ತೆರೆಮೇಲೆ ತಂದಿದ್ದಾರೆ. ನಾಗಾರಾಧನೆಯ ಗಂಭೀರ ಕಥೆಯ ಜೊತೆಗೆ ಧಾರಾವಾಡದ ಹುಡುಗಿ ಕೃತಿ ಪೂಜಾರಿ ಹಾಗೂ ನಾಯಕ ನಿಹಾಲ್ ರೈ ಅವರ ನವಿರಾದ ಲವ್‌ಸ್ಟೋರಿ ಮನಸ್ಸಿಗೆ ಮುದ ನೀಡುತ್ತದೆ. ಪರಿಸರ ಕಾಳಜಿ, ಕಲ್ಲು ಕೋರೆಯ ಪ್ರತಿಭಟನೆ ಹಾಗೂ ಅಲ್ಲಲ್ಲಿ ಬರುವ ಹಿತವಾದ ಹಾಸ್ಯ ಚಿತ್ರದ ಗಂಭೀರತೆಯನ್ನು ಕಾಪಾಡಿಕೊಳ್ಳಲು ನೆರವಾಗಿದೆ.
ಬಲವಾದ ನಟನೆ ಮತ್ತು ತಾರಾಗಣ:ಚಿತ್ರದಲ್ಲಿ ಬಹುತೇಕ ಹೊಸಬರೇ ನಟಿಸಿದ್ದರೂ ಪ್ರತಿಯೊಬ್ಬರ ಅಭಿನಯವೂ ಪ್ರಬುದ್ಧವಾಗಿದೆ. ಅದರಲ್ಲೂ ಸಾಂದೀಪನಿ ಶಾಲೆಯ ಬಾಲನಟಿ ಅಮೃತಾ ಅವರ ಅದ್ಭುತ ನಟನೆ ಹಾಗೂ ನಾಗ ಶಕ್ತಿಯಾಗಿ ಬದಲಾಗುವ ಹಾವಭಾವ ಚಿತ್ರದ ದೊಡ್ಡ ಪ್ಲಸ್ ಪಾಯಿಂಟ್ ಆಗಿದೆ. ವಿಶೇಷವಾಗಿ ವಿಲನ್ ಪಾತ್ರಗಳಲ್ಲಿ ಕಾಣಿಸಿಕೊಂಡಿರುವ ಪತ್ರಕರ್ತ ಜಯಪ್ರಕಾಶ್ ಶೆಟ್ಟಿ ಉಪ್ಪಳ, ವಿಜಯಹರಿ ರೈ, ಶರತ್ ಆಳ್ವ ಕೂರೇಲು ಗಮನ ಸೆಳೆಯುತ್ತಾರೆ. ರಾಷ್ಟ್ರ ಪ್ರಶಸ್ತಿ ಪುರಸ್ಕೃತ ನಟಿ ರೂಪಶ್ರೀ ವರ್ಕಾಡಿ ಅವರ ನಟನೆ ಚಿತ್ರಕ್ಕೆ ಜೀವ ತುಂಬಿದ್ದರೆ, ನಾಯಕ ನಟಿಯಾಗಿ ಕೃತಿ ಪೂಜಾರಿ ಹಾಗೂ ನಾಯಕನಾಗಿ ನಿಹಾಲ್ ರೈ ಭರವಸೆಯ ಅಭಿನಯ ನೀಡಿದ್ದಾರೆ.
ತಾಂತ್ರಿಕ ಶ್ರೀಮಂತಿಕೆ:ಚಿತ್ರದ ಬಹುತೇಕ ಚಿತ್ರೀಕರಣ ತಿಂಗಳಾಡಿ ಕನ್ನಡಮೂಲೆ, ಮಾಡಾವು, ಬೆಳ್ಳಾರೆ, ಮಂಗಳೂರು ಮತ್ತು ಚಿಕ್ಕಮಗಳೂರಿನ ಸುಂದರ ಪರಿಸರದಲ್ಲಿ ನಡೆದಿದೆ. ಅರುಣ್ ರೈ ಪುತ್ತೂರು ಅವರ ಕ್ಯಾಮೆರಾ ಕೈಚಳಕದಿಂದ ಪ್ರತಿಯೊಂದು ದೃಶ್ಯವೂ ದೃಶ್ಯಕಾವ್ಯವಾಗಿ ಮೂಡಿಬಂದಿದೆ. ರಝಾಕ್ ಪುತ್ತೂರು ಅವರ ಮುಜುಗರ ತರದ ಸುಂದರ ಸಂಭಾಷಣೆ, ಜಯಕಾರ್ತಿ ಅವರ ಸಂಗೀತ ಹಾಗೂ ನವೀನ್ ಪಿ.ಎಂ ಕುಂಬ್ಳೆ ಅವರ ಸಂಕಲನ ಚಿತ್ರದ ಗುಣಮಟ್ಟವನ್ನು ಮತ್ತಷ್ಟು ಹೆಚ್ಚಿಸಿದೆ.
ನಿರ್ದೇಶಕ ನಿತಿನ್ ರೈ ಕುಕ್ಕುವಳ್ಳಿಯವರ ಹಿಂದಿನ ‘ಧರ್ಮದೈವ’ ಹಾಗೂ ‘ಧರ್ಮಚಾವಡಿ’ ಚಿತ್ರಗಳಂತೆ ‘ಬನ’ ಕೂಡ ಸಂಪೂರ್ಣ ಭಿನ್ನ ಹಾಗೂ ಯಶಸ್ವಿ ಅನುಭವ ನೀಡುತ್ತದೆ. ಕುಟುಂಬ ಸಮೇತರಾಗಿ ತಪ್ಪದೇ ವೀಕ್ಷಿಸಬೇಕಾದ ಈ ಸಿನಿಮಾ ಅಕ್ಟೋಬರ್ 23 ರಿಂದ ಪುತ್ತೂರು ಜಿಎಲ್ 1 ಮಾಲ್‌ನಲ್ಲಿರುವ ಭಾರತ್‌ ಸಿನಿಮಾಸ್‌ ಸೇರಿದಂತೆ ಪ್ರಮುಖ ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಿದೆ.
