ದಕ್ಷಿಣ ಭಾರತದ ಚಿತ್ರರಂಗದಲ್ಲಿ ತಮ್ಮದೇ ಆದ ವಿಶಿಷ್ಟ ಸಂಗೀತ ಶೈಲಿಯ ಮೂಲಕ ಕೋಟ್ಯಂತರ ಹೃದಯಗಳನ್ನು ಗೆದ್ದಿದ್ದ ಹಿರಿಯ ಸಂಗೀತ ಸಂಯೋಜಕ ದೇವಾ (Deva) ನಮ್ಮನ್ನು ಅಗಲಿದ್ದಾರೆ. 75 ನೇ ವಯಸ್ಸಿನಲ್ಲಿ ಅನಾರೋಗ್ಯದಿಂದ ಬಳಲುತ್ತಿದ್ದ ಅವರು, ಚೆನ್ನೈನ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಫಲಕಾರಿಯಾಗದೆ ಬೆಳಿಗ್ಗೆ ಸುಮಾರು 8.30ರ ವೇಳೆಗೆ ಕೊನೆಯುಸಿರೆಳೆದಿದ್ದಾರೆ. ಈ ಆಘಾತಕಾರಿ ಸುದ್ದಿ ಸಂಗೀತ ಪ್ರೇಮಿಗಳಲ್ಲಿ ಹಾಗೂ ಚಿತ್ರರಂಗದ ಗಣ್ಯರಲ್ಲಿ ತೀವ್ರ ಶೋಕವನ್ನುಂಟು ಮಾಡಿದೆ.
ದೇವನೇಶನ್ ಚೊಕ್ಕಲಿಂಗಮ್ ಎಂಬ ಮೂಲ ಹೆಸರಿನೊಂದಿಗೆ ಸಂಗೀತ ಲೋಕದಲ್ಲಿ ಗುರುತಿಸಿಕೊಂಡಿದ್ದ ದೇವಾ, ತಮಿಳು ಮಾತ್ರವಲ್ಲದೆ ಕನ್ನಡ, ತೆಲುಗು ಮತ್ತು ಮಲಯಾಳಂ ಭಾಷೆಗಳಲ್ಲಿಯೂ ಸುಮಾರು 400ಕ್ಕೂ ಹೆಚ್ಚು ಸಿನಿಮಾಗಳಿಗೆ ಅದ್ಭುತ ಸಂಗೀತ ಹಾಗೂ ಹಿನ್ನೆಲೆ ಸಂಗೀತವನ್ನು ನೀಡಿದ್ದಾರೆ.
ಜನಪದ ಸಂಗೀತದ ಸೊಗಡನ್ನು ಜನಪ್ರಿಯ ಚಿತ್ರಗೀತೆಗಳೊಂದಿಗೆ ಬೆರೆಸಿ ಹೊಸ ಸಂಚಲನ ಸೃಷ್ಟಿಸಿದ್ದ ಇವರ ಸಂಗೀತಕ್ಕೆ ಪ್ರತ್ಯೇಕ ಅಭಿಮಾನಿ ಬಳಗವಿತ್ತು.ಕನ್ನಡದ ಜನಪ್ರಿಯ ಚಿತ್ರಗಳಾದ ‘ಅಮೃತ ವರ್ಷಿಣಿ’, ‘ಕೋಟಿಗೊಬ್ಬ’, ‘ರಾಜಾ’, ‘ಸೈನಿಕ’, ‘ಸಿಂಹಾದ್ರಿಯ ಸಿಂಹ’, ‘ಕದಂಬ’, ‘ವಿಷ್ಣು ಸೇನಾ’ ಹಾಗೂ ‘ಓಲವೇ ಮಂದಾರ’ ಸೇರಿದಂತೆ ಹಲವಾರು ಸಿನಿಮಾಗಳ ಮೂಲಕ ಕನ್ನಡಿಗರ ಮನೆಮಾತಾಗಿದ್ದರು. ವಿಶೇಷವಾಗಿ ‘ಅಮೃತ ವರ್ಷಿಣಿ’ ಚಿತ್ರದ ಸಂಗೀತಕ್ಕಾಗಿ ಕನ್ನಡದ ಅತ್ಯುತ್ತಮ ಸಂಗೀತ ನಿರ್ದೇಶಕ ವಿಭಾಗದಲ್ಲಿ ಫಿಲ್ಮ್‌ಫೇರ್ ಪ್ರಶಸ್ತಿಯನ್ನೂ ಮುಡಿಗೇರಿಸಿಕೊಂಡಿದ್ದರು. ವಿವಿಧ ಭಾಷೆಗಳ ನಡುವೆ ಸಂಗೀತದ ಸೇತುವೆಯಾಗಿ ಬೆಸೆದಿದ್ದ ಹಿರಿಯ ಚೇತನದ ಅಗಲಿಕೆಯಿಂದ ಚಿತ್ರರಂಗ ಕಂಗಾಲಾಗಿದೆ.
