ಬೆಂಗಳೂರು: ಕೇಂದ್ರ ಸರ್ಕಾರವು ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಕಾಯ್ದೆ (ಎಂಜಿನರೇಗಾ) ಬದಲಿಗೆ ‘ವಿಕಸಿತ ಭಾರತ – ಗ್ಯಾರಂಟಿ ಫಾರ್ ರೋಜ್ಗಾರ್ ಹಾಗೂ ಅಜೀವಿಕಾ ಮಿಷನ್ (ಗ್ರಾಮೀಣ)’ ಅಥವಾ ಜಿ ರಾಮ್ ಜಿ ಎಂಬ ಹೊಸ ಕಾಯ್ದೆಯನ್ನು ಜಾರಿಗೆ ತರುತ್ತಿರುವುದಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ತೀವ್ರ ವಿರೋಧ ವ್ಯಕ್ತಪಡಿಸಿದ್ದಾರೆ. ಈ ಬದಲಾವಣೆಯಿಂದ ಕರ್ನಾಟಕಕ್ಕೆ ವಾರ್ಷಿಕ ಕನಿಷ್ಠ 5,000 ಕೋಟಿ ಅನುದಾನ ನಷ್ಟವಾಗಲಿದೆ ಎಂದು ಆತಂಕ ವ್ಯಕ್ತಪಡಿಸಿರುವ ಅವರು, ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಪತ್ರ ಬರೆಯಲು ನಿರ್ಧರಿಸಿದ್ದಾರೆ.
ಹಣಕಾಸಿನ ಹೊರೆ ಮತ್ತು ಅನುದಾನ ಕಡಿತಹೊಸ ಯೋಜನೆಯ ಅಡಿಯಲ್ಲಿ ರಾಜ್ಯಗಳು ಒಟ್ಟು ವೆಚ್ಚದ ಶೇ. 40ರಷ್ಟು ಪಾಲನ್ನು ಭರಿಸಬೇಕಾಗುತ್ತದೆ. ಈ ಹಿಂದೆ ನರೇಗಾ ಯೋಜನೆಯಡಿ ಕೇಂದ್ರ ಸರ್ಕಾರವೇ ಕೂಲಿ ವೆಚ್ಚದ ಶೇ. 100ರಷ್ಟು ಮತ್ತು ಸಾಮಗ್ರಿ ವೆಚ್ಚದ ಶೇ. 75ರಷ್ಟನ್ನು ಭರಿಸುತ್ತಿತ್ತು. ಈ ಬದಲಾವಣೆಯಿಂದ ರಾಜ್ಯದ ಆರ್ಥಿಕತೆಯ ಮೇಲೆ ಭಾರಿ ಒತ್ತಡ ಬೀಳಲಿದ್ದು, ಕರ್ನಾಟಕವು ಪ್ರತಿ ವರ್ಷ 5,000 ಕೋಟಿ ರೂ.ಗಿಂತ ಅಧಿಕ ಅನುದಾನ ಕಳೆದುಕೊಳ್ಳಲಿದೆ ಎಂದು ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆ ಅಂದಾಜಿಸಿದೆ
ಉದ್ಯೋಗ ಭದ್ರತೆಗೆ ಧಕ್ಕೆ?ಗ್ರಾಮೀಣಾಭಿವೃದ್ಧಿ ಸಚಿವ ಪ್ರಿಯಾಂಕ್ ಖರ್ಗೆ ಅವರು ಕೇಂದ್ರದ ಹೊಸ ಕಾಯ್ದೆಯನ್ನು “ಅವೈಜ್ಞಾನಿಕ” ಎಂದು ಟೀಕಿಸಿದ್ದು, ಇದು ಗ್ರಾಮೀಣ ಜನರ ಹಿತಾಸಕ್ತಿಗೆ ವಿರುದ್ಧವಾಗಿದೆ ಎಂದು ದೂರಿದ್ದಾರೆ. ಅವರ ಪ್ರಕಾರ, ಈ ಹಿಂದೆ ಇದ್ದ ‘ಬೇಡಿಕೆ ಆಧಾರಿತ’ ಉದ್ಯೋಗ ವ್ಯವಸ್ಥೆಯನ್ನು ಕೈಬಿಟ್ಟು ಕೇಂದ್ರದ ‘ಪೂರೈಕೆ ಆಧಾರಿತ’ ವ್ಯವಸ್ಥೆ ಜಾರಿಗೆ ತರುತ್ತಿರುವುದು ಮತ್ತು ಕೃಷಿ ಹಂಗಾಮಿನ ನೆಪದಲ್ಲಿ ವರ್ಷದ 60 ದಿನಗಳ ಕಾಲ ಉದ್ಯೋಗ ನಿಷೇಧಿಸಿರುವುದು ಮಳೆ ನಂಬಿದ ಗ್ರಾಮೀಣ ಕುಟುಂಬಗಳನ್ನು ಸಂಕಷ್ಟಕ್ಕೆ ತಳ್ಳಲಿದೆ. ಅಲ್ಲದೆ, ಬಹು ಆಯಾಮದ ಬಡತನ ಸೂಚ್ಯಂಕ ಆಧರಿಸಿ ಹಣ ಹಂಚಿಕೆ ಮಾಡುವ ಹೊಸ ನಿಯಮದಿಂದಾಗಿ, ಬಡತನ ನಿರ್ಮೂಲನೆಯಲ್ಲಿ ಉತ್ತಮ ಸಾಧನೆ ಮಾಡಿರುವ ಕರ್ನಾಟಕದಂತಹ ದಕ್ಷಿಣ ರಾಜ್ಯಗಳಿಗೆ ಅನುದಾನ ಕಡಿತವಾಗಿ, ಉತ್ತರ ಭಾರತದ ರಾಜ್ಯಗಳಿಗೆ ಹೆಚ್ಚಿನ ಪಾಲು ಹೋಗುವ ಮೂಲಕ ರಾಜ್ಯಕ್ಕೆ ಅನ್ಯಾಯವಾಗಲಿದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ.ಅಂಕಿ-ಅಂಶಗಳು ಹೇಳುವುದೇನು?ಕೇಂದ್ರ ಸರ್ಕಾರದ ನೂತನ ‘ಜಿ-ರಾಮ್-ಜಿ’ ಕಾಯ್ದೆಯಿಂದ ಕರ್ನಾಟಕಕ್ಕೆ ವಾರ್ಷಿಕವಾಗಿ ಸುಮಾರು 5,000 ಕೋಟಿ ರೂ. ಅನುದಾನ ಕಡಿತವಾಗುವ ಭೀತಿ ಎದುರಾಗಿದ್ದು, ಇದರ ವಿರುದ್ಧ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಪ್ರಧಾನಿ ಮೋದಿಯವರಿಗೆ ಪತ್ರ ಬರೆದು ಆಕ್ಷೇಪ ವ್ಯಕ್ತಪಡಿಸಲು ಉದ್ದೇಶಿಸಿದ್ದಾರೆ. ಕಳೆದ ಮೂರು ವರ್ಷಗಳಲ್ಲಿ ಕರ್ನಾಟಕವು ನರೇಗಾ ಯೋಜನೆಯಡಿ 21,411 ಕೋಟಿ ರೂ.ವೆಚ್ಚದಲ್ಲಿ 16 ಲಕ್ಷಕ್ಕೂ ಅಧಿಕ ಆಸ್ತಿಗಳನ್ನು ಸೃಜಿಸಿದ್ದು, ಸುಮಾರು 80.2 ಲಕ್ಷ ಕುಟುಂಬಗಳಿಗೆ (ಇದರಲ್ಲಿ 25.6 ಲಕ್ಷ SC ಮತ್ತು 9.4 ಲಕ್ಷ ST ಕುಟುಂಬಗಳು ಸೇರಿವೆ) ಉದ್ಯೋಗ ನೀಡುವ ಮೂಲಕ ಯೋಜನೆಯ ದೊಡ್ಡ ಫಲಾನುಭವಿಯಾಗಿದೆ. ಆದರೆ ಹೊಸ ಕಾಯ್ದೆಯಡಿ ರಾಜ್ಯಗಳು ಶೇ. 40 ರಷ್ಟು ಆರ್ಥಿಕ ಪಾಲನ್ನು ಭರಿಸಬೇಕಿರುವುದು ಮತ್ತು ಯೋಜನೆಯು ಬೇಡಿಕೆ ಆಧಾರಿತ ವ್ಯವಸ್ಥೆಯಿಂದ ಪೂರೈಕೆ ಆಧಾರಿತ ವ್ಯವಸ್ಥೆಗೆ ಬದಲಾಗುತ್ತಿರುವುದು ಗ್ರಾಮೀಣ ಬಡವರ ಬದುಕುವ ಹಕ್ಕನ್ನು ಕಸಿದುಕೊಳ್ಳಲಿದೆ ಎಂದು ರಾಜ್ಯ ಸರ್ಕಾರ ಆತಂಕ ವ್ಯಕ್ತಪಡಿಸಿದೆ. ಈ ಯೋಜನೆಯಿಂದ ಮಹಾತ್ಮ ಗಾಂಧಿಯವರ ಹೆಸರನ್ನು ಕೈಬಿಟ್ಟಿರುವುದು ಅವಮಾನಕರ ಮತ್ತು ರಾಜ್ಯಗಳನ್ನು ಸಂಪರ್ಕಿಸದೆ ಇಂತಹ ಏಕಪಕ್ಷೀಯ ತೀರ್ಮಾನ ಕೈಗೊಂಡಿರುವುದು ಅನ್ಯಾಯ ಎಂದು ಸಿಎಂ ಕಚೇರಿಯ ಅಧಿಕಾರಿಗಳು ತಿಳಿಸಿದ್ದಾರೆ.
