Kiren Rijiju: ಸರ್ಕಾರ ವಾಯು ಮಾಲಿನ್ಯದ ಕುರಿತಾದ ಚರ್ಚೆಯನ್ನು ಆರಂಭಿಸಿದ ಬಳಿಕವೂ ವಿರೋಧ ಪಕ್ಷಗಳು ಗೊಂದಲ ಸೃಷ್ಟಿಸುತ್ತಿರುವುದಕ್ಕೆ ಮತ್ತು ವಿಷಯದ ಬಗ್ಗೆ ಮಾತನಾಡಲು ತಮ್ಮ ಪಕ್ಷದ ಸಂಸದೆ ಪ್ರಿಯಾಂಕಾ ಗಾಂಧಿ ವಾದ್ರಾಗೆ ಅವಕಾಶ ನೀಡದಿದ್ದಕ್ಕಾಗಿ ಕೇಂದ್ರ ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.ಇಂಡಿಯಾ ಟುಡೇ ಟಿವಿಯೊಂದಿಗೆ ಮಾತನಾಡಿದ ರಿಜಿಜು, ಪ್ರಿಯಾಂಕಾ ಗಾಂಧಿ ವಾದ್ರಾ ಹೆಸರಿನಲ್ಲಿ ಚರ್ಚೆಯನ್ನು ಪಟ್ಟಿ ಮಾಡಲಾಗಿತ್ತು. ಅವರು ವಿಪಕ್ಷಗಳ ಕಡೆಯಿಂದ ಪ್ರಮುಖ ಭಾಷಣಕಾರರಾಗಬೇಕಿತ್ತು. ಆದರೆ, ಮಾಲಿನ್ಯದ ಬಗ್ಗೆ ಪ್ರಿಯಾಂಕಾ ಮಾತನಾಡುವ ಅವಕಾಶವನ್ನು ಕಾಂಗ್ರೆಸ್ ಪಕ್ಷ ಹೇಗೆ ಅಡ್ಡಿಪಡಿಸಿತು ಎಂಬುದರ ಕುರಿತು ನಾನು ಯಾವುದೇ ರಾಜಕೀಯ ತೀರ್ಮಾನಗಳನ್ನು ತೆಗೆದುಕೊಳ್ಳಲು ಬಯಸುವುದಿಲ್ಲ ಎಂದು ಹೇಳಿದರು.

ಕಾಂಗ್ರೆಸ್ ಸಂಸದರು ಕುರ್ಚಿಗಳು ಮತ್ತು ಮೇಜುಗಳ ಮೇಲೆ ಹತ್ತಿ ಸಂಪೂರ್ಣವಾಗಿ ಅನಾಗರಿಕರ ರೀತಿ, ಪ್ರಜಾಪ್ರಭುತ್ವ ವಿರೋಧಿ ರೀತಿಯಲ್ಲಿ ವರ್ತಿಸುವ ಮೂಲಕ ಮಾಲಿನ್ಯದ ಕುರಿತ ಚರ್ಚೆಯನ್ನು ಹಳಿತಪ್ಪಿಸಿತು ಎಂದು ಆರೋಪಿಸಿದರು. ಚಳಿಗಾಲದ ಅಧಿವೇಶನದಲ್ಲಿ ಪ್ರಿಯಾಂಕಾ ಗಾಂಧಿ ವಾದಗಳು, ಇತರ ವಿರೋಧ ಪಕ್ಷದ ಸದಸ್ಯರಿಗೆ ಹೋಲಿಸಿದರೆ ಸಮತೋಲಿತ ಮತ್ತು ಹೆಚ್ಚು ಸ್ವೀಕಾರಾರ್ಹವಾಗಿದ್ದವು ಎಂದಿರುವ ರಿಜೀಜು, ಪ್ರಿಯಾಂಕಾ ತಮ್ಮ ಮಾತಿನ ಮೇಲೆ ನಿಯಂತ್ರಣವನ್ನು ಕಾಯ್ದುಕೊಂಡಿದ್ದರು, ಹೇಳಿಕೆಗಳ ಮೂಲಕ ಯಾವುದೇ ಸಮಸ್ಯೆಗಳನ್ನು ಸೃಷ್ಟಿಸಲಿಲ್ಲ, ವಿಷಯ ಪ್ರಸ್ತುತಿಯ ಸಮಯದಲ್ಲಿ ಅವರು ನಡೆದುಕೊಂಡ ರೀತಿಯನ್ನು ನಾನು ಮೆಚ್ಚುತ್ತೇನೆ ಎಂದರು.ದೆಹಲಿಯಲ್ಲಿ ವಾಯು ಗುಣಮಟ್ಟ ಕುಸಿತದ ಬಗ್ಗೆ ವಿವರವಾದ ಚರ್ಚೆಗೆ ಇಡೀ ದಿನವನ್ನು ಮೀಸಲಿಡಲಾಗಿತ್ತು, ಈಗಾಗಲೇ ಸಮಯವನ್ನು ನಿಗದಿಪಡಿಸಲಾಗಿದೆ ಎಂದು ಹೇಳಿದರು. ಆದರೆ, ಕಾಂಗ್ರೆಸ್ ಇದ್ದಕ್ಕಿದ್ದಂತೆ ಕುರ್ಚಿಗಳು ಮತ್ತು ಮೇಜುಗಳ ಮೇಲೆ ಹತ್ತಿ, ಸಂಸತ್ತಿನ ಕಲಾಪಕ್ಕೆ ಅಡ್ಡಿಪಡಿಸಿ, ಗದ್ದಲ ಸೃಷ್ಟಿಸಿತು ಎಂದು ರಿಜಿಜು ಆರೋಪಿಸಿದರು. ಶಾಂತಿ ಮಸೂದೆ ಮತ್ತು ಜಿ ರಾಮ್ ಜಿ ಕುರಿತು ಎಂಟು ಗಂಟೆಗಳ ಚರ್ಚೆಗೆ ವಿರೋಧ ಪಕ್ಷಗಳು ಒತ್ತಾಯಿಸಿದ್ದವು ಮತ್ತು ಸರ್ಕಾರ ಅದಕ್ಕೆ ಒಪ್ಪಿಕೊಂಡಿತು, ರಾತ್ರಿಯಿಡೀ ಕುಳಿತುಕೊಳ್ಳಲು ಅಥವಾ ಮರುದಿನ ಚರ್ಚೆಯನ್ನು ಮುಂದುವರಿಸಲು ಸಿದ್ಧತೆಯನ್ನು ವ್ಯಕ್ತಪಡಿಸಿತು. ಯುಪಿಎ ಸರ್ಕಾರವು ಈ ಹಿಂದೆ ಚರ್ಚೆಯನ್ನು ಮೊಟಕುಗೊಳಿಸುತ್ತಿತ್ತು, ಆದರೆ ಪ್ರಸ್ತುತ ಸರ್ಕಾರವು ಕೇಳಿದಷ್ಟು ಸಮಯವನ್ನು ನೀಡಲು ಸಿದ್ಧವಿದೆ ಎಂದು ಹೇಳಿದರು.

ಯಾರಾದರು ಆರ್‌ಎಸ್‌ಎಸ್ ಸಿದ್ಧಾಂತವನ್ನು ಸಹಿಸದಿದ್ದರೆ, ಅದು ಅವರವರ ಆಯ್ಕೆ, ಆದರೆ ಇಷ್ಟವಿದ್ದವರು ಅದನ್ನು ಸ್ವೀಕರಿಸುತ್ತಾರೆ. ನಿಮ್ಮ ಸೋಲು ಮತ ಕಳ್ಳತನದಿಂದಾಗಿ ಎಂದು ನೀವು ಭಾವಿಸಿದರೆ, ಸಮಾಜದಲ್ಲಿ ಶಾಂತಿ ಇರುವುದಿಲ್ಲ. ಉತ್ತಮ ಪ್ರಜ್ಞೆ ಮೇಲುಗೈ ಸಾಧಿಸಬೇಕು ಮತ್ತು ಜನರ ಆದೇಶವನ್ನು ಗೌರವಿಸಬೇಕು ಎಂದು ಕಿರಣ್​ ರಿಜೀಜು ವಿಪಕ್ಷಗಳಿಗೆ ಸಲಹೆ ನೀಡಿದರು