ಮಂಗಳವಾರ ಸಂಜೆಯ ವೇಳೆಗೆ ದಿಢೀರನೆ ರಭಸದ ಮಳೆ ಸುರಿದಿದ್ದು, ಸಾರ್ವಜನಿಕ ಜೀವನ ಸಂಪೂರ್ಣ ಅಸ್ತವ್ಯಸ್ತಗೊಂಡಿದೆ. ಬೆಳಿಗ್ಗೆಯಿಂದಲೇ ಕ ಮೋಡಕವಿದ ವಾತಾವರಣವಿತ್ತಾದರೂ, ಸಂಜೆ ವೇಳೆಗೆ ಅಬ್ಬರಿಸಿದ ವರುಣನ ಆರ್ಭಟಕ್ಕೆ ಪಟ್ಟಣದ ಪ್ರಮುಖ ರಸ್ತೆಗಳೆಲ್ಲವೂ ಹೊಳೆಯಂತಾಗಿ ಮಾರ್ಪಟ್ಟಿದ್ದವು.ವಿಶೇಷವಾಗಿ ಸುಳ್ಯದ ಶ್ರೀರಾಮ ಪೇಟೆ ಹಾಗೂ ಬೊಳುಬೈಲು ಪರಿಸರದಲ್ಲಿ ಮಳೆ ನೀರು ಚರಂಡಿಗಳನ್ನು ಮೀರಿ ನೇರವಾಗಿ ರಸ್ತೆಯ ಮೇಲೆಯೇ ರಭಸವಾಗಿ ಹರಿದಿದೆ.
ಹಠಾತ್ ಹರಿದು ಬಂದ ಮಳೆ ನೀರಿನ ರಭಸಕ್ಕೆ ಕೆಲವೆಡೆ ಅಂಗಡಿ ಮುಂಗಟ್ಟುಗಳೊಳಗೂ ನೀರು ನುಗ್ಗಿ ವರ್ತಕರು ಮತ್ತು ಸಾರ್ವಜನಿಕರು ತೀವ್ರ ಪರದಾಟ ನಡೆಸುವಂತಾಯಿತು. ರಸ್ತೆಗಳು ಸಂಪೂರ್ಣ ಜಲಾವೃತಗೊಂಡಿದ್ದರಿಂದ ಪಾದಚಾರಿಗಳು ಹಾಗೂ ವಾಹನ ಸವಾರರು ಸಾಗಲು ಹರಸಾಹಸ ಪಟ್ಟರು. ಮುರಾಸು ಚಂಡಮಾರುತದ ಪ್ರಭಾವದಿಂದಾಗಿ ಕಳೆದ ಎರಡು ದಿನಗಳಿಂದ ರಾಜ್ಯದಾದ್ಯಂತ ವ್ಯಾಪಕ ಮಳೆಯಾಗುತ್ತಿದ್ದು, ಅದರ ಭಾಗವಾಗಿ ಇಲ್ಲೂ ಧಾರಾಕಾರ ಮಳೆ ದಾಖಲಾಗಿದೆ.
