ಅಮೆರಿಕದ ಮಧ್ಯಂತರ ಚುನಾವಣೆಯಲ್ಲಿ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಬೆಂಬಲಿತ ಅಭ್ಯರ್ಥಿಗೆ ಭಾರಿ ಮುಖಭಂಗವಾಗಿದೆ. ಅತ್ಯಂತ ನಿರ್ಣಾಯಕ ಎನಿಸಿಕೊಂಡಿದ್ದ ಮಿಚಿಗನ್ ರಾಜ್ಯದ ಸೆನೆಟ್ ಚುನಾವಣೆಯಲ್ಲಿ ಡೆಮಾಕ್ರಟಿಕ್ ಪಕ್ಷದ ಅಭ್ಯರ್ಥಿ ಅಬ್ದುಲ್ ಎಲ್ ಸಯೀದ್ ಚಾರಿತ್ರಿಕ ಜಯ ಸಾಧಿಸುವ ಮೂಲಕ ಯುಎಸ್ ಸೆನೆಟರ್ ಆಗಿ ಆಯ್ಕೆಯಾದ ಅಮೆರಿಕದ ಪ್ರಥಮ ಮುಸ್ಲಿಂ ಎಂಬ ಅಪರೂಪದ ದಾಖಲೆ ಬರೆದಿದ್ದಾರೆ.
ಮಾಜಿ ಸಾರ್ವಜನಿಕ ಆರೋಗ್ಯಾಧಿಕಾರಿಯಾಗಿದ್ದ ಸಯೀದ್, ತಳಮಟ್ಟದಲ್ಲಿ ಸಾರ್ವಜನಿಕ ಸಂಪರ್ಕ ಬೆಳೆಸಿ, ಜನಪರ ನೀತಿ ಹಾಗೂ ಉಚಿತ ಆರೋಗ್ಯ ಸೇವೆಗಳ ಭರವಸೆ ನೀಡಿ ರಿಪಬ್ಲಿಕನ್ ಪಕ್ಷದ ಪ್ರಬಲ ಸ್ಪರ್ಧಿ ಮೈಕ್ ರೋಜರ್ಸ್ ಅವರನ್ನು ಮಣ್ಣುಮುಕ್ಕಿಸಿದ್ದಾರೆ.
ಉತ್ತರ ಕನ್ನಡ ಜಿಲ್ಲೆಯ ಭಟ್ಕಳದ ಜೊತೆ ಅಪರೂಪದ ನಂಟು:ವಿಶೇಷವೆಂದರೆ, ಈ ಜಾಗತಿಕ ರಾಜಕೀಯ ಗೆಲುವಿನ ಹಿಂದೆ ಕರ್ನಾಟಕದ ಹೆಮ್ಮೆಯ ನಂಟಿದೆ. ಅಬ್ದುಲ್ ಎಲ್ ಸಯೀದ್ ಅವರ ಧರ್ಮಪತ್ನಿ ಡಾ. ಸಾರಾ ಜುಕಾಕು ಉತ್ತರ ಕನ್ನಡ ಜಿಲ್ಲೆಯ ಭಟ್ಕಳ ಮೂಲದವರಾಗಿದ್ದು, ಪ್ರಸ್ತುತ ಅಮೆರಿಕದಲ್ಲಿ ವೈದ್ಯೆಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಸಾರಾ ಅವರ ಅಜ್ಜ ಶಂಶುದ್ದಿನ್ ಬಿನ್ ಹುಸೈನ್ ಸಾಹೇಬ್ ಜುಕಾಕು ಅವರು ಅಂದಿನ ಮೈಸೂರು ಸರ್ಕಾರದಲ್ಲಿ ಸಚಿವರಾಗಿ ಸೇವೆ ಸಲ್ಲಿಸಿದ್ದರು.
ತಮ್ಮ ಕೌಟುಂಬಿಕ ಹಿನ್ನೆಲೆಯ ಬಗ್ಗೆ ಒಮ್ಮೆ ಹೆಮ್ಮೆಯಿಂದ ಮಾತನಾಡಿದ್ದ ಸಯೀದ್, “ನಾನು ದಕ್ಷಿಣ ಭಾರತೀಯ ಕುಟುಂಬದ ಜತೆ ಒಡನಾಟ ಹೊಂದಿ 20 ವರ್ಷಗಳಾಗಿವೆ. ಹಾಗಾಗಿ ನಾನು ಅರಬ್‌ಗಿಂತಲೂ ಹೆಚ್ಚಾಗಿ ಭಾರತೀಯ” ಎಂದು ಸ್ಮರಿಸಿಕೊಂಡಿದ್ದರು. ಕರುನಾಡಿನ ನಂಟಿರುವ ನಾಯಕನ ಈ ಅಪ್ರತಿಮ ಜಯಕ್ಕೆ ಎಲ್ಲೆಡೆಯಿಂದ ಶ್ಲಾಘನೆ ವ್ಯಕ್ತವಾಗುತ್ತಿದೆ.
