ಮುಂಬೈ: ದೇಶದ ಅತಿದೊಡ್ಡ ವಿಮಾನಯಾನ ಸಂಸ್ಥೆ ಇಂಡಿಗೋ (ಇಂಟರ್ಗ್ಲೋಬ್ ಏವಿಯೇಷನ್) ತೀವ್ರ ಬಿಕ್ಕಟ್ಟನ್ನು ಎದುರಿಸುತ್ತಿದೆ. ಪರಿಣಾಮವಾಗಿ, ಡಿಸೆಂಬರ್ 8 ರಂದು ಕಂಪನಿಯ ಷೇರುಗಳು ಸುಮಾರು ಶೇ. 10ರಷ್ಟು ಭಾರೀ ಕುಸಿತ ಕಂಡಿದ್ದು, ಹೂಡಿಕೆದಾರರಲ್ಲಿ ಆತಂಕ ಮೂಡಿಸಿದೆ. ಇದೇ ವೇಳೆ, ಇಂಡಿಗೋ ಎದುರಾಳಿ ಸಂಸ್ಥೆಯಾದ ಸ್ಪೈಸ್ಜೆಟ್ನ ಷೇರುಗಳು ಮೌಲ್ಯದಲ್ಲಿ ಭಾರಿ ಏರಿಕೆ ಕಂಡಿವೆ.
ಏನಿದು ಇಂಡಿಗೋ ಬಿಕ್ಕಟ್ಟು ?ಕಳೆದ ಆರು ದಿನಗಳಲ್ಲಿ ಇಂಡಿಗೋ ಸಂಸ್ಥೆಯು 2,000ಕ್ಕೂ ಹೆಚ್ಚು ದೇಶೀಯ ಮತ್ತು ಅಂತಾರಾಷ್ಟ್ರೀಯ ವಿಮಾನಗಳನ್ನು ರದ್ದುಗೊಳಿಸಿದೆ. ಇದರಿಂದಾಗಿ ದಿಲ್ಲಿ ಸೇರಿದಂತೆ ದೇಶದ ಪ್ರಮುಖ ವಿಮಾನ ನಿಲ್ದಾಣಗಳಲ್ಲಿ ಪ್ರಯಾಣಿಕರು ಪರದಾಡುವಂತಾಗಿದೆ. ವಿಮಾನಗಳ ಹಾರಾಟದ ಸಮಯದ ಮಿತಿ (ಎಫ್ಡಿಟಿಎಲ್) ಕುರಿತಾದ ಹೊಸ ನಿಯಮಗಳು ಜಾರಿಗೆ ಬಂದ ನಂತರ, ಪೈಲಟ್ಗಳು ಮತ್ತು ಸಿಬ್ಬಂದಿಯ ತೀವ್ರ ಕೊರತೆಯನ್ನು ಇಂಡಿಗೋ ಎದುರಿಸುತ್ತಿದೆ. ಹೊಸ ನಿಯಮಗಳ ಪ್ರಕಾರ ಸಿಬ್ಬಂದಿಗೆ ಹೆಚ್ಚಿನ ವಿಶ್ರಾಂತಿ ನೀಡಬೇಕಿದ್ದು, ಅದಕ್ಕೆ ತಕ್ಕಂತೆ ರೋಸ್ಟರ್ (ಕೆಲಸದ ವೇಳಾಪಟ್ಟಿ) ಸಿದ್ಧಪಡಿಸಲು ವಿಫಲವಾಗಿರುವುದೇ ಈ ಗೊಂದಲಕ್ಕೆ ಮುಖ್ಯ ಕಾರಣವಾಗಿದೆ.
ದಿನದಂತ್ಯಕ್ಕೆ ಕಂಪನಿ ಷೇರುಗಳು 447 ರೂ. ಅಥವಾ ಶೇ. 8.32ರಷ್ಟು ಕುಸಿತ ಕಂಡು 4,923.50 ರೂ.ನಲ್ಲಿ ವಹಿವಾಟು ಕೊನೆಗೊಳಿಸಿತು.
ಸಿಇಒಗೆ ಡಿಜಿಸಿಎ ನೋಟಿಸ್ಯೋಜನೆ ಮತ್ತು ಸಂಪನ್ಮೂಲ ನಿರ್ವಹಣೆಯಲ್ಲಿನ ಗಂಭೀರ ಲೋಪಗಳನ್ನು ಪ್ರಶ್ನಿಸಿ ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (ಡಿಜಿಸಿಎ), ಇಂಡಿಗೋ ಸಿಇಒ ಪೀಟರ್ ಎಲ್ಬರ್ಸ್ ಅವರಿಗೆ ಶೋಕಾಸ್ ನೋಟಿಸ್ ಜಾರಿ ಮಾಡಿದೆ. ಹೊಸ ಎಫ್ಡಿಟಿಎಲ್ ನಿಯಮಗಳಿಗೆ ಸಿದ್ಧರಾಗುವಲ್ಲಿ ವಿಫಲವಾಗಿದ್ದೇ ಈ ಅವ್ಯವಸ್ಥೆಗೆ ಕಾರಣ ಎಂದು ಡಿಜಿಸಿಎ ಆರೋಪಿಸಿದೆ.ಈ ಕುರಿತು ರಾಜ್ಯಸಭೆಯಲ್ಲಿ ಮಾತನಾಡಿದ ಕೇಂದ್ರ ನಾಗರಿಕ ವಿಮಾನಯಾನ ಸಚಿವ ರಾಮ್ ಮೋಹನ್ ನಾಯ್ಡು ಕಿಂಜರಾಪು, “ಇದು ಇಂಡಿಗೋ ಸಂಸ್ಥೆಯ ಆಂತರಿಕ ಯೋಜನೆ ಮತ್ತು ಸಿಬ್ಬಂದಿ ರೋಸ್ಟರಿಂಗ್ ವೈಫಲ್ಯದಿಂದ ಉಂಟಾದ ಸಮಸ್ಯೆ,” ಎಂದು ಸ್ಪಷ್ಟಪಡಿಸಿದ್ದಾರೆ. ಅಲ್ಲದೆ, ದೇಶದಲ್ಲಿ ವಿಮಾನಯಾನ ಕ್ಷೇತ್ರಕ್ಕೆ ಹೆಚ್ಚಿನ ಸಂಸ್ಥೆಗಳ ಅಗತ್ಯವಿದೆ ಎಂದು ಅವರು ಪ್ರತಿಪಾದಿಸಿದ್ದಾರೆ.
ಏನನ್ನುತ್ತಿವೆ ಬ್ರೋಕರೇಜ್ ಸಂಸ್ಥೆಗಳು?
ಇಂಡಿಗೋ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಪ್ರಮುಖ ಬ್ರೋಕರೇಜ್ ಸಂಸ್ಥೆಗಳು ತಮ್ಮ ನಿಲುವನ್ನು ಪ್ರಕಟಿಸಿವೆ:
ಯುಬಿಎಸ್ ‘ಬೈ’ ರೇಟಿಂಗ್ ಉಳಿಸಿಕೊಂಡಿದ್ದರೂ, ಗುರಿ ಬೆಲೆಯನ್ನು 6,350 ರೂ.ಗೆ ಇಳಿಸಿದೆ. ಅಂತಾರಾಷ್ಟ್ರೀಯ ವಿಸ್ತರಣೆಯು ಇಂಡಿಗೋಗೆ ದೀರ್ಘಾವಧಿಯಲ್ಲಿ ಲಾಭದಾಯಕವಾಗಲಿದೆ ಎಂದು ಹೇಳಿದೆ.
ಜೆಫರೀಸ್ ಡಿಸೆಂಬರ್ ಮಧ್ಯದ ವೇಳೆಗೆ ಪರಿಸ್ಥಿತಿ ಸಹಜ ಸ್ಥಿತಿಗೆ ಬರಬಹುದು ಎಂದು ಅಂದಾಜಿಸಿದ್ದು, 7,025 ರೂ.ಗಳ ಟಾರ್ಗೆಟ್ ಪ್ರೈಸ್ನೊಂದಿಗೆ ‘ಬೈ’ ರೇಟಿಂಗ್ ನೀಡಿದೆ.
ಜೆಎಂ ಫೈನಾನ್ಷಿಯಲ್ ‘ರೆಡ್ಯೂಸ್’ ಅಥವಾ ಷೇರು ಮಾರಾಟಕ್ಕೆ ಸಲಹೆ ನೀಡಿದ್ದು, ಗುರಿ ಬೆಲೆಯನ್ನು 5,570 ರೂ.ಗೆ ನಿಗದಿಪಡಿಸಿದೆ.
ಸ್ಪೈಸ್ಜೆಟ್ಗೆ ಲಾಭ
ಒಂದೆಡೆ ಇಂಡಿಗೋ ನಷ್ಟದಲ್ಲಿದ್ದರೆ, ಮತ್ತೊಂದೆಡೆ ಸ್ಪೈಸ್ಜೆಟ್ ಷೇರುಗಳು ಒಂದೇ ದಿನದಲ್ಲಿ ಶೇ. 14ಕ್ಕೂ ಹೆಚ್ಚು ಏರಿಕೆ ಕಂಡು 35.50 ರೂ.ಗೆ ತಲುಪಿವೆ. ಕಳೆದ ಎರಡು ದಿನಗಳಲ್ಲಿ ಸ್ಪೈಸ್ಜೆಟ್ ಷೇರು ಬರೋಬ್ಬರಿ ಶೇ. 17ರಷ್ಟು ಏರಿಕೆ ಕಂಡಿದೆ. 2025ರ ಅಂತ್ಯದ ವೇಳೆಗೆ ತನ್ನ ಕಾರ್ಯಾಚರಣೆಯ ವಿಮಾನಗಳ ಸಂಖ್ಯೆಯನ್ನು ದ್ವಿಗುಣಗೊಳಿಸುವ ಗುರಿಯನ್ನು ಸ್ಪೈಸ್ಜೆಟ್ ಹೊಂದಿದೆ. ಅಲ್ಲದೆ, ಗ್ರೌಂಡ್ ಆಗಿರುವ ಬೋಯಿಂಗ್ ವಿಮಾನಗಳನ್ನು ಹಂತಹಂತವಾಗಿ ಸೇವೆಗೆ ಮರಳಿ ತರಲು ಯೋಜನೆ ರೂಪಿಸಿದೆ.ಇತ್ತ ಇಂಡಿಗೋ ಬಿಕ್ಕಟ್ಟನ್ನು ಎದುರಿಸುತ್ತಿದ್ದು, ಇದು ಸ್ಪೈಸ್ಜೆಟ್ಗೆ ಲಾಭ ತಂದುಕೊಡಬಹುದು ಎಂದು ಹೂಡಿಕೆದಾರರು ಭಾವಿಸಿದ್ದಾರೆ. ಪರಿಣಾಮ ಷೇರುಗಳು ಏರಿಕೆ ಕಾಣುತ್ತಿದ್ದು, ಸೋಮವಾರದ ದಿನದಂತ್ಯಕ್ಕೆ 1.39 ರೂ. ಅಥವಾ ಶೇ. 4.47ರಷ್ಟು ಏರಿಕೆಯೊಂದಿಗೆ 32.50 ರೂ.ನಲ್ಲಿ ವಹಿವಾಟು ಕೊನೆಗೊಳಿಸಿದೆ.
