ಇಸ್ಲಾಮಾಬಾದ್​: ಪಾಕಿಸ್ತಾನದ ಅತಿ ದೊಡ್ಡ ಮತ್ತು ಅತಿ ಹೆಚ್ಚು ಸಂಘರ್ಷಪೀಡಿತ ಪ್ರಾಂತ್ಯವಾದ ಬಲೂಚಿಸ್ತಾನದಲ್ಲಿ(Balochistan Conflict) ಕಳೆದ 48 ಗಂಟೆಗಳಲ್ಲಿ ನಡೆದ ಸರಣಿ ಕಾರ್ಯಾಚರಣೆಗಳಲ್ಲಿ ರಕ್ತದ ಹಳ್ಳವೇ ಹರಿದಿದೆ. ಭದ್ರತಾ ಪಡೆಗಳು ನಡೆಸಿದ ಬೃಹತ್ ಸಾರಿಗೆ ಮತ್ತು ವಾಯುಪಡೆ ದಾಳಿಗಳಲ್ಲಿ ಒಟ್ಟು 57 ಭಯೋತ್ಪಾದಕರನ್ನು ಹತ್ಯೆ ಮಾಡಲಾಗಿದೆ. ಆದರೆ, ಭಯೋತ್ಪಾದಕರ ಆತ್ಮಾಹುತಿ ದಾಳಿ ಮತ್ತು ಹೊಂಚುಹಾಕಿ ನಡೆಸಿದ ಗುಂಡಿನ ದಾಳಿಯಲ್ಲಿ 10 ಭದ್ರತಾ ಸಿಬ್ಬಂದಿಗಳು ಕೂಡ ಮೃತಪಟ್ಟಿದ್ದಾರೆ.

ದಾಳಿಯ ಸ್ವರೂಪ ಮತ್ತು ಸ್ಥಳಗಳು

ಅಧಿಕೃತ ಮಾಹಿತಿಯ ಪ್ರಕಾರ, ಉಗ್ರರು ಬಲೂಚಿಸ್ತಾನದ ಸುಮಾರು 12 ಪ್ರತ್ಯೇಕ ಸ್ಥಳಗಳಲ್ಲಿ ಅತ್ಯಂತ ಸಂಘಟಿತವಾಗಿ ದಾಳಿ ನಡೆಸಿದ್ದರು.

ಪಂಜ್‌ಗುರ್ ಮತ್ತು ಹರ್ನೈ

ಈ ಎರಡು ಜಿಲ್ಲೆಗಳಲ್ಲಿ ಗುರುವಾರ ಮತ್ತು ಶುಕ್ರವಾರ ನಡೆಸಿದ ಕಾರ್ಯಾಚರಣೆಯಲ್ಲೇ 41 ಉಗ್ರರನ್ನು ಹೊಡೆದುರುಳಿಸಲಾಗಿತ್ತು.

ಶನಿವಾರದ ಕಾರ್ಯಾಚರಣೆ

ಶನಿವಾರ ಮುಂಜಾನೆಯಿಂದ ಮಧ್ಯಾಹ್ನದವರೆಗೆ ನಡೆದ ದಾಳಿ-ಪ್ರತಿ ದಾಳಿಗಳಲ್ಲಿ ಮತ್ತೆ 16 ಉಗ್ರರು ಸಾವನ್ನಪ್ಪಿದ್ದಾರೆ.

ಟಾರ್ಗೆಟ್

ಉಗ್ರರು ಕೇವಲ ಸೇನಾ ಚೆಕ್ ಪೋಸ್ಟ್‌ಗಳನ್ನು ಮಾತ್ರವಲ್ಲದೆ, ನಾಗರಿಕ ಮೂಲಸೌಕರ್ಯಗಳು ಮತ್ತು ಕಾನೂನು ಜಾರಿ ಸಂಸ್ಥೆಗಳ ಕಚೇರಿಗಳ ಮೇಲೆ ಗ್ರೆನೇಡ್ ಹಾಗೂ ಸುಧಾರಿತ ಸ್ಫೋಟಕಗಳ (IED) ಮೂಲಕ ದಾಳಿ ನಡೆಸಿದ್ದರು.

ಪಾಕ್ ಸೇನೆಗೆ ಭಾರೀ ಹೊಡೆತ

ಭಯೋತ್ಪಾದಕರನ್ನು ಸದೆಬಡಿಯುವಲ್ಲಿ ಯಶಸ್ವಿಯಾದರೂ, ಪಾಕಿಸ್ತಾನಿ ಸೇನೆಗೆ ಈ ಕಾರ್ಯಾಚರಣೆ ದುಬಾರಿಯಾಗಿ ಪರಿಣಮಿಸಿದೆ. 10 ಭದ್ರತಾ ಸಿಬ್ಬಂದಿಗಳು ಹೋರಾಡುತ್ತಲೇ ವೀರಮರಣ ಅಪ್ಪಿದ್ದಾರೆ. ಇದರಲ್ಲಿ ಅಧಿಕಾರಿ ಮಟ್ಟದ ಸಿಬ್ಬಂದಿಗಳೂ ಸೇರಿದ್ದಾರೆ ಎಂದು ವರದಿಯಾಗಿದೆ. ದಾಳಿಯ ತೀವ್ರತೆ ಎಷ್ಟಿತ್ತೆಂದರೆ, ಕೆಲವು ಪ್ರದೇಶಗಳಲ್ಲಿ ಭದ್ರತಾ ಪಡೆಗಳಿಗೆ ಸಹಾಯ ಮಾಡಲು ಹೆಲಿಕಾಪ್ಟರ್‌ಗಳನ್ನು ಬಳಸಬೇಕಾಯಿತು.

ಬಲೂಚಿಸ್ತಾನದಲ್ಲಿ ಹಿಂಸಾಚಾರಕ್ಕೆ ಕಾರಣವೇನು..?ಬಲೂಚಿಸ್ತಾನದಲ್ಲಿ ಹಲವು ದಶಕಗಳಿಂದ ಪ್ರತ್ಯೇಕತಾವಾದಿ ಗುಂಪುಗಳು ಸಕ್ರಿಯವಾಗಿವೆ. ಇತ್ತೀಚಿನ ದಾಳಿಗಳ ಹಿಂದೆ ಮೂರು ಪ್ರಮುಖ ಕಾರಣಗಳಿವೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.

ಸಂಪನ್ಮೂಲಗಳ ಹಂಚಿಕೆ

ಬಲೂಚಿಸ್ತಾನದ ನೈಸರ್ಗಿಕ ಅನಿಲ ಮತ್ತು ಚಿನ್ನದ ಗಣಿಗಳನ್ನು ಪಾಕಿಸ್ತಾನ ಸರ್ಕಾರ ಲೂಟಿ ಮಾಡುತ್ತಿದೆ ಎಂಬುದು ಸ್ಥಳೀಯರ ಆಕ್ರೋಶವಾಗಿದೆ.

CPEC ಯೋಜನೆ

ಚೀನಾ-ಪಾಕಿಸ್ತಾನ ಆರ್ಥಿಕ ಕಾರಿಡಾರ್ (CPEC) ಅಡಿಯಲ್ಲಿ ಚೀನಾ ಇಲ್ಲಿನ ಬಂದರುಗಳನ್ನು ಅಭಿವೃದ್ಧಿಪಡಿಸುತ್ತಿರುವುದನ್ನು ಉಗ್ರರು ವಿರೋಧಿಸುತ್ತಿದ್ದಾರೆ.

ಸೇನಾ ದಬ್ಬಾಳಿಕೆ

ಪಾಕ್ ಸೇನೆಯು ಸಾವಿರಾರು ಬಲೂಚಿ ಯುವಕರನ್ನು ಕಿಡ್ನಾಪ್ ಮಾಡಿ ಕೊಂದಿದೆ ಎಂಬ ಬಲವಂತದ ನಾಪತ್ತೆ ಪ್ರಕರಣಗಳು ಇಲ್ಲಿನ ಜನರನ್ನು ಉಗ್ರವಾದದತ್ತ ತಳ್ಳುತ್ತಿವೆ.

ಪ್ರಸ್ತುತ ಸ್ಥಿತಿ

ಬಲೂಚಿಸ್ತಾನದ ಬಹುತೇಕ ಜಿಲ್ಲೆಗಳಲ್ಲಿ ಈಗ ಕರ್ಫ್ಯೂ ಮಾದರಿಯ ಪರಿಸ್ಥಿತಿ ನಿರ್ಮಾಣವಾಗಿದೆ. ಮೊಬೈಲ್ ಮತ್ತು ಇಂಟರ್ನೆಟ್ ಸೇವೆಗಳನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ. ಇಡೀ ಪ್ರಾಂತ್ಯದಲ್ಲಿ ಭದ್ರತೆಯನ್ನು ತೀವ್ರಗೊಳಿಸಲಾಗಿದ್ದು, ಕ್ಲೀನ್-ಅಪ್ ಕಾರ್ಯಾಚರಣೆ ಮುಂದುವರಿಯುತ್ತಿದೆ,