ನವದೆಹಲಿ: ದೀರ್ಘಕಾಲದ ಉದ್ವಿಗ್ನತೆಯ ನಂತರ ಅಮೆರಿಕಮತ್ತು ಇರಾನ್ ನಡುವೆ ಏರ್ಪಟ್ಟಿರುವ ಕದನ ವಿರಾಮ ಒಪ್ಪಂದವು ಜಾಗತಿಕ ಮಾರುಕಟ್ಟೆಯಲ್ಲಿ ಭಾರಿ ಸಂಚಲನ ಮೂಡಿಸಿದೆ. ಯುದ್ಧದ ಭೀತಿ ಕಡಿಮೆಯಾಗುತ್ತಿದ್ದಂತೆಯೇ ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಭಾರಿ ಪ್ರಮಾಣದಲ್ಲಿ ಕುಸಿದಿದ್ದು, ಹೂಡಿಕೆದಾರರಲ್ಲಿ ಹೊಸ ಭರವಸೆ ಮೂಡಿಸಿದೆ. ಇದರ ಪರಿಣಾಮವಾಗಿ ಅಮೆರಿಕ ಸೇರಿದಂತೆ ವಿಶ್ವದ ಪ್ರಮುಖ ಷೇರು ಮಾರುಕಟ್ಟೆಗಳು ಭರ್ಜರಿ ಏರಿಕೆ ಕಂಡಿವೆ.
ತೈಲ ಬೆಲೆ ಶೇ. 7 ಕ್ಕಿಂತ ಹೆಚ್ಚು ಕುಸಿತ:
ಕದನ ವಿರಾಮದ ಸುದ್ದಿ ಹೊರಬೀಳುತ್ತಿದ್ದಂತೆಯೇ ತೈಲ ಮಾರುಕಟ್ಟೆಯಲ್ಲಿ ದೊಡ್ಡ ಮಟ್ಟದ ಬದಲಾವಣೆ ಕಂಡುಬಂದಿದೆ. ಬ್ರೆಂಟ್ ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್‌ಗೆ ಶೇ. 7.57 ರಷ್ಟು ಇಳಿಕೆಯಾಗಿದ್ದು, 91.87 ಡಾಲರ್‌ಗೆ ತಲುಪಿದೆ. ಇನ್ನು ಅಮೆರಿಕದ ಡಬ್ಲ್ಯುಟಿಐ (WTI) ಕಚ್ಚಾ ತೈಲದ ಬೆಲೆ ಶೇ. 9.63 ರಷ್ಟು ಅಂದರೆ ಬರೋಬ್ಬರಿ 9.12 ಡಾಲರ್ ಕುಸಿದು 85.57 ಡಾಲರ್‌ಗೆ ಇಳಿದಿದೆ. ಇರಾನ್‌ನ ಹಾರ್ಮುಜ್ ಜಲಸಂಧಿಯ ಮೂಲಕ ತೈಲ ಸಾಗಣೆಗೆ ಸುರಕ್ಷಿತ ಮಾರ್ಗ ಕಲ್ಪಿಸಲು ಮತ್ತು ಎರಡು ವಾರಗಳ ಕಾಲ ಮಿಲಿಟರಿ ಕಾರ್ಯಾಚರಣೆ ಸ್ಥಗಿತಗೊಳಿಸಲು ಇರಾನ್ ಒಪ್ಪಿಕೊಂಡಿರುವುದು ತೈಲ ಪೂರೈಕೆಯ ಆತಂಕವನ್ನು ದೂರ ಮಾಡಿದೆ.
ಷೇರು ಮಾರುಕಟ್ಟೆಯಲ್ಲಿ ಗೂಳಿ ಓಟ:
ಒಂದೆಡೆ ತೈಲ ಬೆಲೆ ಕುಸಿದಿದ್ದರೆ, ಇನ್ನೊಂದೆಡೆ ಷೇರು ಮಾರುಕಟ್ಟೆಗಳು ರಾಕೆಟ್ ವೇಗದಲ್ಲಿ ಪುಟಿದೆದ್ದಿವೆ. ಅಮೆರಿಕದ ಡೌ ಜೋನ್ಸ್ ಸೂಚ್ಯಂಕವು 868 ಪಾಯಿಂಟ್ಸ್ (ಶೇ. 1.79) ಏರಿಕೆ ಕಂಡು 49,447 ಕ್ಕೆ ತಲುಪಿದೆ. ಅದೇ ರೀತಿ ಎಸ್ ಅಂಡ್ ಪಿ 500 ಮತ್ತು ನಾಸ್‌ಡಾಕ್ ಸೂಚ್ಯಂಕಗಳು ಕೂಡ ಕ್ರಮವಾಗಿ ಶೇ. 1.20 ಮತ್ತು ಶೇ. 1.52 ರಷ್ಟು ಲಾಭ ದಾಖಲಿಸಿವೆ. ಹೂಡಿಕೆದಾರರು ಈಗ ಸುರಕ್ಷಿತ ಹೂಡಿಕೆಯಾದ ಚಿನ್ನದಿಂದ ಹೊರಬಂದು ಷೇರುಗಳಲ್ಲಿ ಹಣ ಹೂಡುತ್ತಿದ್ದಾರೆ. ಆದರೂ ಚಿನ್ನದ ಬೆಲೆ ಶೇ. 0.94 ರಷ್ಟು ಅಲ್ಪ ಏರಿಕೆ ಕಂಡು 4,833 ಡಾಲರ್ ಆಸುಪಾಸಿನಲ್ಲಿದೆ.
ಏಷ್ಯಾದಲ್ಲಿ ಮಿಶ್ರ ಪ್ರತಿಕ್ರಿಯೆ:
ಪಾಶ್ಚಿಮಾತ್ಯ ಮಾರುಕಟ್ಟೆಗಳಲ್ಲಿ ಸಂಭ್ರಮ ಮನೆಮಾಡಿದ್ದರೆ, ಏಷ್ಯಾದ ಮಾರುಕಟ್ಟೆಗಳಲ್ಲಿ ಸ್ವಲ್ಪ ಮಟ್ಟದ ಇಳಿಕೆ ಕಂಡುಬಂದಿದೆ.ಜಪಾನ್‌ನ ನಿಕೈ ಸೂಚ್ಯಂಕ ಶೇ. 1.78 ರಷ್ಟು ಕುಸಿದಿದ್ದರೆ, ಹಾಂಕಾಂಗ್‌ನ ಹ್ಯಾಂಗ್ ಸೆಂಗ್ ಮತ್ತು ತೈವಾನ್ ಮಾರುಕಟ್ಟೆಗಳು ಕೂಡ ಅಲ್ಪ ನಷ್ಟ ಅನುಭವಿಸಿವೆ. ಆದರೆ, ಮುಂಬರುವ ದಿನಗಳಲ್ಲಿ ಅಮೆರಿಕ ಮತ್ತು ಇರಾನ್ ನಡುವೆ ಇಸ್ಲಾಮಾಬಾದ್‌ನಲ್ಲಿ ಶಾಂತಿ ಶೃಂಗಸಭೆ ನಡೆಯುವ ಸಾಧ್ಯತೆ ಇರುವುದರಿಂದ ಮುಂದಿನ ವಾರ ಏಷ್ಯಾದ ಮಾರುಕಟ್ಟೆಗಳೂ ಚೇತರಿಸಿಕೊಳ್ಳುವ ನಿರೀಕ್ಷೆಯಿದೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಈ ಮಾತುಕತೆಗಳ ಬಗ್ಗೆ ವಿಶ್ವಾಸ ವ್ಯಕ್ತಪಡಿಸಿದ್ದು, ವಾರಾಂತ್ಯದಲ್ಲೂ ಚರ್ಚೆಗಳು ಮುಂದುವರಿಯಲಿವೆ ಎಂದು ತಿಳಿಸಿದ್ದಾರೆ. ಲೆಬನಾನ್ ಸೇರಿದಂತೆ ಮಧ್ಯಪ್ರಾಚ್ಯದ ಇತರ ಪ್ರದೇಶಗಳಲ್ಲೂ ಶಾಂತಿ ಸ್ಥಾಪನೆಯಾಗುವ ಮುನ್ಸೂಚನೆಗಳು ಸಿಗುತ್ತಿರುವುದು ಜಾಗತಿಕ ಆರ್ಥಿಕತೆಗೆ ಪೂರಕವಾದ ವಾತಾವರಣ ನಿರ್ಮಿಸಿದೆ.
