ಬೆಂಗಳೂರು: ಅಕ್ಷಯ ತೃತೀಯದ ಹಿನ್ನೆಲೆಯಲ್ಲಿ ಈ ಬಾರಿ ಕರ್ನಾಟಕ ಸೇರಿದಂತೆ ಇಡೀ ದಕ್ಷಿಣ ಭಾರತದಲ್ಲಿ ಆಭರಣಗಳ ವಹಿವಾಟು ಭರ್ಜರಿಯಾಗಿ ನಡೆದಿದೆ. ದರ ಏರಿಕೆಯ ನಡುವೆಯೂ ದಕ್ಷಿಣ ಭಾರತದಲ್ಲಿ ಅಂದಾಜು 20 ಸಾವಿರ ಕೋಟಿ ರೂಪಾಯಿಗಳ ವ್ಯವಹಾರ ನಡೆದಿದ್ದು. ಕರ್ನಾಟಕವೊಂದರಲ್ಲೇ 2,500 ಕೋಟಿ ರೂ. ಮೌಲ್ಯದ ಚಿನ್ನ ಮತ್ತು ಬೆಳ್ಳಿ ಮಾರಾಟವಾಗಿದೆ.
ರಾಜ್ಯದಲ್ಲಿ 1.5 ಟನ್ ಚಿನ್ನ ಮಾರಾಟ:ಈ ಬಾರಿ ಅಕ್ಷಯ ತೃತೀಯವು ಭಾನುವಾರ ಮತ್ತು ಸೋಮವಾರ ಎರಡು ದಿನಗಳ ಕಾಲ ಬಂದಿದ್ದರಿಂದ ಗ್ರಾಹಕರ ಖರೀದಿ ಭರಾಟೆ ಹೆಚ್ಚಾಗಿತ್ತು. ಕರ್ನಾಟಕದಲ್ಲಿ ಅಂದಾಜು 1.5 ಟನ್ ಚಿನ್ನ ಹಾಗೂ 10 ಟನ್ ಬೆಳ್ಳಿ ಮಾರಾಟವಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಬೆಲೆ ಹೆಚ್ಚಾಗಿರುವುದರಿಂದ, ಹಣಕಾಸಿನ ವಹಿವಾಟಿನ ಮೌಲ್ಯ ಏರಿಕೆಯಾಗಿದ್ದರೂ, ಮಾರಾಟವಾದ ಚಿನ್ನದ ತೂಕದಲ್ಲಿ ತುಸು ಇಳಿಕೆ ಕಂಡುಬಂದಿದೆ.
ದಕ್ಷಿಣ ಭಾರತದ ಚಿತ್ರಣ:“ದಕ್ಷಿಣ ಭಾರತದಾದ್ಯಂತ ಎರಡು ದಿನಗಳಲ್ಲಿ ಒಟ್ಟು 200 ಟನ್ ಚಿನ್ನ ಹಾಗೂ 1,000 ಟನ್ ಬೆಳ್ಳಿ ಮಾರಾಟವಾಗಿದೆ” ಎಂದು ಕರ್ನಾಟಕ ಜ್ಯುವೆಲ್ಲರಿ ಅಸೋಸಿಯೇಷನ್ ಅಧ್ಯಕ್ಷ ಟಿ.ಎ. ಶರವಣ ತಿಳಿಸಿದ್ದಾರೆ. ಜಾಗತಿಕ ಸಂಘರ್ಷಗಳ ನಡುವೆಯೂ ಭಾರತೀಯರು ಚಿನ್ನದ ಮೇಲಿನ ನಂಬಿಕೆಯನ್ನು ಮುಂದುವರಿಸಿದ್ದಾರೆ ಎಂದು ಆಭರಣ ತಯಾರಕರ ಸಂಘದ ಅಧ್ಯಕ್ಷ ಡಾ. ಬಿ. ರಾಮಾಚಾರಿ ಅಭಿಪ್ರಾಯಪಟ್ಟಿದ್ದಾರೆ.
ಬದಲಾದ ಗ್ರಾಹಕರ ಟ್ರೆಂಡ್:ಚಿನ್ನ ಮತ್ತು ಬೆಳ್ಳಿ ಬೆಲೆಯು ಬಹುತೇಕ ದುಪ್ಪಟ್ಟಾಗಿರುವ ಕಾರಣ, ಗ್ರಾಹಕರು ಈ ಬಾರಿ ಸಣ್ಣ ಪುಟ್ಟ ಆಭರಣಗಳಿಗೆ ಆದ್ಯತೆ ನೀಡಿದ್ದಾರೆ.ಲೈಟ್ ವೇಟ್ ಆಭರಣ: ದೊಡ್ಡ ಆಭರಣಗಳ ಬದಲಿಗೆಲಕ್ಷ್ಮಿ ಕಾಯಿನ್, ಪೆಂಡೆಂಟ್ ಮತ್ತು ಉಂಗುರಗಳ ಖರೀದಿ ಹೆಚ್ಚಿತ್ತು.ಹಳೆಯ ಚಿನ್ನದ ವಿನಿಮಯ: ಶೇ. 40 ರಿಂದ 50 ರಷ್ಟುಗ್ರಾಹಕರು ಹಳೆಯ ಆಭರಣಗಳನ್ನು ನೀಡಿ ಹೊಸದನ್ನು ಖರೀದಿಸಿದ್ದಾರೆ.ಗೋಲ್ಡ್ ಚೀಟಿ: ಮುಂದಿನ ವರ್ಷದ ಅಕ್ಷಯತೃತೀಯಕ್ಕೆ ಸಿದ್ಧರಾಗಲು ಅನೇಕ ಮಹಿಳೆಯರು ಈ ದಿನವೇ ಹೊಸ ಚಿನ್ನದ ಉಳಿತಾಯ ಯೋಜನೆಗಳನ್ನು (Gold Chits) ಆರಂಭಿಸಿದ್ದಾರೆ.
ಮಾರಾಟದಲ್ಲಿ ಶೇ. 30ರಷ್ಟು ಇಳಿಕೆ:ಅಖಿಲ ಭಾರತೀಯ ಚಿನ್ನ ಮತ್ತು ಆಭರಣಗಳ ಸಂಘದ (IBJA) ಅಧ್ಯಕ್ಷ ಪೃಥ್ವಿರಾಜ್ ಕೊಠಾರಿ ಅವರ ಪ್ರಕಾರ, ದೇಶಾದ್ಯಂತ ಚಿನ್ನದ ಬೇಡಿಕೆಯ ಪ್ರಮಾಣದಲ್ಲಿ ಶೇ. 30ರಷ್ಟು ಕುಸಿತ ಕಂಡಿದೆ. ಕಳೆದ ವರ್ಷ 15 ಟನ್ ಚಿನ್ನ ಮಾರಾಟವಾಗಿದ್ದರೆ, ಈ ಬಾರಿ 10.5 ಟನ್ ಮಾತ್ರ ಮಾರಾಟವಾಗಿದೆ. ಆದರೆ, ಬೆಲೆ ಹೆಚ್ಚಳದ ಕಾರಣ ವಹಿವಾಟಿನ ಮೌಲ್ಯವು ಶೇ. 20-25 ರಷ್ಟು ಏರಿಕೆಯಾಗಿದೆ.
