ಬೆಂಗಳೂರು: ಮೂರು ಹೊಸ ವಂದೇ ಭಾರತ್ ರೈಲು ಆರಂಭಿಸಲು ರೈಲ್ವೆ ಇಲಾಖೆಯು ಸಿದ್ಧತೆ ನಡೆಸಿದೆ. ಈ ಮೂರರ ಪೈಕಿ 2 ರೈಲು ಕರ್ನಾಟಕ – ಕೇರಳ ನಡುವೆ ಸಂಚಾರ ನಡೆಸಲಿದ್ದು, ಬೆಂಗಳೂರು, ಮಂಗಳೂರಿಗೆ ಅನುಕೂಲವಾಗಲಿದೆ.
ಭಾರತೀಯ ರೈಲ್ವೇ ಕೇರಳ ತಮಿಳುನಾಡಿಗೆ ಹಲವು ಅಮೃತ್ ಭಾರತ್ ರೈಲುಗಳನ್ನು ನೀಡಿತ್ತು. ಮುಂದುವರೆದು ಮೂರು ಪ್ರಮುಖ ಮಾರ್ಗಗಳಲ್ಲಿ ವಂದೇ ಭಾರತ್ ಸ್ಲೀಪರ್ ರೈಲುಗಳನ್ನು ಓಡಿಸಲು ಯೋಜಿಸಿದೆ. ಈ ಹೊಸ ರೈಲುಗಳು ಪ್ರಯಾಣದ ಸಮಯವನ್ನು ಸಾಕಷ್ಟು ಕಡಿಮೆ ಮಾಡಿ ಆರಾಮದಾಯಕ ಪ್ರಯಾಣ ಅನುಭವ ನೀಡಲಿವೆ.
ಮೂರು ಮಾರ್ಗಗಳು ಎಲ್ಲಿಂದ ಎಲ್ಲಿಗೆ?
- ತಿರುವನಂತಪುರಂ – ಬೆಂಗಳೂರು
- ತಿರುವನಂತಪುರಂ – ಮಂಗಳೂರು
- ತಿರುವನಂತಪುರಂ – ಚೆನ್ನೈ
ಈ ವಂದೇ ಭಾರತ್ ಸ್ಲೀಪರ್ ರೈಲುಗಳ ಪರಿಚಯವು ಕೇರಳ ಮತ್ತು ತಮಿಳುನಾಡು ವಿಧಾನಸಭಾ ಚುನಾವಣೆಗಳ ಹಿನ್ನೆಲೆಯಲ್ಲಿ ಉಭಯ ರಾಜ್ಯಗಳ ನಡುವಿನ ಸಂಪರ್ಕವನ್ನು ಹೆಚ್ಚಿಸುವ ಉದ್ದೇಶವನ್ನು ಹೊಂದಿದೆ. ಪ್ರಸ್ತುತ, ಕೇರಳದಲ್ಲಿ ಓಡುತ್ತಿರುವ ಎರಡು ವಂದೇ ಭಾರತ್ ಎಕ್ಸ್ಪ್ರೆಸ್ ರೈಲುಗಳಲ್ಲಿ, ತಿರುವನಂತಪುರಂ -ಮಂಗಳೂರು ಮಾರ್ಗದ ರೈಲು ಹೆಚ್ಚು ಆದಾಯವನ್ನು ಗಳಿಸುತ್ತಿದೆ. 2023ರ ಏಪ್ರಿಲ್ನಲ್ಲಿ ಕೇರಳದಲ್ಲಿ ಮೊದಲ ವಂದೇ ಭಾರತ್ ಸೇವೆ ಆರಂಭಗೊಂಡು ಯಶಸ್ಸು ಕಂಡಿದೆ.
ಮಂಗಳೂರು – ತಿರುವನಂತಪುರಂ ವಂದೇ ಭಾರತ್ ಸ್ಲೀಪರ್ಮಂಗಳೂರು – ತಿರುವನಂತಪುರಂ (ಕೊಟ್ಟಾಯಂ ಮೂಲಕ) ಮಾರ್ಗದಲ್ಲಿ 631 ಕಿಲೋಮೀಟರ್ ಪ್ರಯಾಣಕ್ಕೆ ಪ್ರಸ್ತುತ 14 ಗಂಟೆ ಬೇಕಾಗುತ್ತದೆ. ವಂದೇ ಭಾರತ್ ಸ್ಲೀಪರ್ ರೈಲು ಈ ಸಮಯವನ್ನು ಸುಮಾರು ಮೂರೂವರೆ ಗಂಟೆಗಳಷ್ಟು ಕಡಿಮೆ ಮಾಡಲಿದೆ. ಇದರ ಟಿಕೆಟ್ ದರ, ಪ್ರಸ್ತುತ ಇರುವ ಎಕ್ಸ್ಪ್ರೆಸ್ ರೈಲಿನ ಮೂರು-ಶ್ರೇಣಿ ಮತ್ತು ಎರಡು-ಶ್ರೇಣಿ ಎಸಿ ದರಕ್ಕಿಂತ 500 ರೂ. ಹೆಚ್ಚಾಗಿರಲಿದೆ ಎನ್ನಲಾಗಿದೆ.
ತಿರುವನಂತಪುರಂ – ಚೆನ್ನೈ ವಂದೇ ಭಾರತ್ ಸ್ಲೀಪರ್ತಿರುವನಂತಪುರಂ – ಚೆನ್ನೈ (ಪಾಲಕ್ಕಾಡ್ ಮೂಲಕ) ಮಾರ್ಗದಲ್ಲಿ 922 ಕಿಲೋಮೀಟರ್ ಪ್ರಯಾಣಕ್ಕೆ ಪ್ರಸ್ತುತ 16 ಗಂಟೆ 30 ನಿಮಿಷ ಬೇಕಾಗುತ್ತದೆ. ವಂದೇ ಭಾರತ್ ಸ್ಲೀಪರ್ ರೈಲು ಈ ಪ್ರಯಾಣದ ಸಮಯವನ್ನು ಮೂರು ಗಂಟೆಗಳಷ್ಟು ಕಡಿಮೆ ಮಾಡಲಿದೆ. ಈ ಮಾರ್ಗದ ಟಿಕೆಟ್ ದರ, ಪ್ರಸ್ತುತ ಇರುವ ಎಕ್ಸ್ಪ್ರೆಸ್ ರೈಲಿನ ದರಕ್ಕಿಂತ 1,000 ರೂ ಹೆಚ್ಚಾಗಿರಲಿದೆ ಎಂದು ಅಂದಾಜಿಸಲಾಗಿದೆ.
ತಿರುವನಂತಪುರಂ – ಬೆಂಗಳೂರು ವಂದೇ ಭಾರತ್ ಸ್ಲೀಪರ್ಅದೇ ರೀತಿ, ತಿರುವನಂತಪುರಂ-ಬೆಂಗಳೂರು ಮಾರ್ಗದಲ್ಲಿ 844 ಕಿಲೋಮೀಟರ್ ಪ್ರಯಾಣಕ್ಕೆ ಪ್ರಸ್ತುತ 15 ಗಂಟೆ 30 ನಿಮಿಷ ಬೇಕಾಗುತ್ತದೆ. ವಂದೇ ಭಾರತ್ ಸ್ಲೀಪರ್ ರೈಲು ಈ ಪ್ರಯಾಣದ ಸಮಯವನ್ನು ಮೂರು ಗಂಟೆಗಳಷ್ಟು ಉಳಿಸಲಿದೆ. ಈ ಮಾರ್ಗದ ಟಿಕೆಟ್ ದರ, ಪ್ರಸ್ತುತ ಇರುವ ಎಕ್ಸ್ಪ್ರೆಸ್ ರೈಲಿನ ದರಕ್ಕಿಂತ 800 ರೂ. ಹೆಚ್ಚಾಗಿರಲಿದೆ. ಈ ರೈಲು ಕೊಚ್ಚುವೇಲಿಯಿಂದ (ತಿರುವನಂತಪುರಂ ಉತ್ತರ) ಹೊರಟು, ಕೊಟ್ಟಾಯಂ ಮೂಲಕ ಬೆಂಗಳೂರಿನ ಎಸ್ಎಂವಿಟಿ ಬೆಂಗಳೂರು ನಿಲ್ದಾಣತಲುಪಲಿದೆ. ಈ ಪ್ರಸ್ತಾವವನ್ನು ರೈಲ್ವೆ ಬೋರ್ಡ್ಗೆ ಸಲ್ಲಿಸಲಾಗಿದೆ. ಈ ರೈಲು ರಾತ್ರಿ 7:30ಕ್ಕೆ ತಿರುವನಂತಪುರದಿಂದ ಹೊರಟು 12 ಗಂಟೆಗಳಲ್ಲಿ ಕ್ರಮಿಸಿ ಬೆಂಗಳೂರು ತಲುಪಲಿದೆ. ಈ ಹೊಸ ಮಾರ್ಗವು ಪ್ರಯಾಣಿಕರಿಗೆ ಅನುಕೂಲವಾಗುವ ನಿರೀಕ್ಷೆಯಿದೆ.ಈ ವಂದೇ ಭಾರತ್ ಸ್ಲೀಪರ್ ರೈಲುಗಳಲ್ಲಿ ಕೇವಲ ಖಚಿತ ಟಿಕೆಟ್ಗಳನ್ನು ಮಾತ್ರ ನೀಡಲಾಗುತ್ತದೆ. ಆರ್ಎಸಿ, ವೇಟಿಂಗ್ ಲೀಸ್ಟ್ ಟಿಕೆಟ್ಗಳು ಲಭ್ಯವಿರುವುದಿಲ್ಲ. ಕನಿಷ್ಠ 400 ಕಿಲೋಮೀಟರ್ ಪ್ರಯಾಣಕ್ಕೆ ಮಾತ್ರ ಟಿಕೆಟ್ ಬುಕ್ ಮಾಡಲು ಅವಕಾಶವಿದೆ. ಈ ಸಂಪೂರ್ಣವಾಗಿ ಹವಾನಿಯಂತ್ರಿತ ರೈಲು 16 ಬೋಗಿಗಳನ್ನು ಹೊಂದಿದ್ದು, ಒಟ್ಟು 823 ಪ್ರಯಾಣಿಕರಿಗೆ ಆಸನ ವ್ಯವಸ್ಥೆ ಇರಲಿದೆ. ಇದರಲ್ಲಿ 11 ಕೋಚ್ 3 ಎಸಿ, 4 ಕೋಚ್ 2 ಎಸಿ ಮತ್ತು 1 ಕೋಚ್ ಎಸಿ ಬೋಗಿಗಳು ಸೇರಿವೆ.
