ಭಾರತೀಯ ಮೂಲದ ಅಮೆರಿಕ ಗಗನಯಾನಿ ಸುನಿತಾ ವಿಲಿಯಮ್ಸ್ ಹಾಗೂ ಬುಚ್ ವಿಲ್ಮೋರ್ ಅವರನ್ನು ಭೂಮಿಗೆ ಕರೆ ತರಲು ನಾಸಾ ವಿಜ್ಞಾನಿಗಳ ತಂಡ ಸ್ಪೇಸ್ಎಕ್ಸ್ ಡ್ರ್ಯಾಗನ್ ‘ದಿ ಕ್ರೂ-10’ ಉಡಾವಣೆ ಮಾಡಿತ್ತು. ಇದು ಭಾನುವಾರ ಯಶಸ್ವಿಯಾಗಿ ಬಾಹ್ಯಾಕಾಶ ನಿಲ್ದಾಣ ತಲುಪಿದೆ. ಬಾಹ್ಯಾಕಾಶ ನಿಲ್ದಾಣ ತಲುಪಿದ ನೌಕೆಯಲ್ಲಿ ನಾಲ್ವರು ಗಗನಯಾತ್ರಿಗಳು ಹಿಂದಿರುಗಲಿದ್ದಾರೆ.
ವಾಷಿಂಗ್ಟನ್: ಬಾಹ್ಯಾಕಾಶದಲ್ಲಿ ಸಿಲುಕಿರುವ ಭಾರತೀಯ ಮೂಲದ ಅಮೆರಿಕ ಗಗನಯಾನಿ ಸುನಿತಾ ವಿಲಿಯಮ್ಸ್ ಹಾಗೂ ಬುಚ್ ವಿಲ್ಮೋರ್ ಅವರನ್ನು ಭೂಮಿಗೆ ಕರೆ ತರಲು ನಾಸಾ ವಿಜ್ಞಾನಿಗಳ ತಂಡ ಉಡಾವಣೆ ಮಾಡಿದ ಸ್ಪೇಸ್ಎಕ್ಸ್ ಡ್ರ್ಯಾಗನ್ ಸ್ಪೇಸ್ಕ್ರಾಫ್ಟ್ ‘ದಿ ಕ್ರ್ಯೂ-10’ ಭಾನುವಾರ ಯಶಸ್ವಿಯಾಗಿ ಬಾಹ್ಯಾಕಾಶ ನಿಲ್ದಾಣ ತಲುಪಿದೆ.
ಕಳೆದ 9 ತಿಂಗಳಿಂದ ಬಾಹ್ಯಾಕಾಶ ನಿಲ್ದಾಣದಲ್ಲಿ ಸಿಲುಕಿರುವ ವಿಲಿಯಮ್ಸ್ ಹಾಗೂ ವಿಲ್ಮೋರ್ ಅವರು ಮಾರ್ಚ್ 19ರಂದು ಭೂಮಿಗೆ ಮರಳುವ ಸಾಧ್ಯತೆಗಳಿವೆ.
ಕೆನಡಿ ಬಾಹ್ಯಾಕಾಶ ಉಡ್ಡಾಯನ ಕೇಂದ್ರದಿಂದ ಸ್ಪೇಸ್ಎಕ್ಸ್ನ ಫಾಲ್ಕನ್-9 ರಾಕೆಟ್ ಮೂಲಕ ಬಾಹ್ಯಾಕಾಶ ನಿಲ್ದಾಣ ತಲುಪಿರುವ ಡ್ರ್ಯಾಗನ್ ಸ್ಪೇಸ್ಕ್ರಾಫ್ಟ್ ‘ದಿ ಕ್ರ್ಯೂ-10’ ನೌಕೆಯಲ್ಲಿ ಗಗನಯಾನಿಗಳಾದ ನಾಸಾದ ಅನ್ನೆ ಮೆಕ್ಲೇನ್, ನಿಕೋಲ್ ಅಯೇರ್ಸ್, ಜಪಾನ್ನ ತಕುಯಾ ಒನಿಶಿ, ರಷ್ಯಾದ ಕಿರಿಲ್ ಪೆಸ್ಕೋವ್ ಅವರಿದ್ದಾರೆ.
ನಾಲ್ವರು ಭೂಮಿಗೆ ವಾಪಸ್ಬಾಹ್ಯಾಕಾಶ ನಿಲ್ದಾಣ ತಲುಪಿರುವ ಸ್ಪೇಸ್ಎಕ್ಸ್ ಗಗನನೌಕೆ ಸುನಿತಾ ವಿಲಿಯನ್ಸ್ ಹಾಗೂ ಬುಚ್ ವಿಲ್ಮೋರ್ ಜತೆ ಗಗನಯಾನಿಗಳಾದ ನಿಕ್ ಹೇಗ್, ಅಲೆಕ್ಸಾಂಡರ್ ಗೊರ್ಬನೊವ್ ಅವರನ್ನು ಮರಳಿ ಭೂಮಿಗೆ ಕರೆ ತರಲಿದೆ. ನಿಗದಿತ ಯೋಜನೆಯಂತೆ ಸಾಗಿದರೆ ನಾಲ್ವರು ಗಗನಯಾನಿಗಳು ಬುಧವಾರ ಭೂಮಿಗೆ ತಲುಪಲಿದ್ದಾರೆ. ರಕ್ಷಣಾ ನೌಕೆಯಲ್ಲಿ ತೆರಳಿರುವ ನಾಲ್ವರು ಸೇರಿದಂತೆ ಒಟ್ಟು 11 ಗಗನಯಾನಿಗಳ ತಂಡ ಬಾಹ್ಯಾಕಾಶ ನಿಲ್ದಾಣದಲ್ಲೇ ಉಳಿಯಲಿದೆ.
ಕಳೆದ ವರ್ಷದ ಜೂನ್ 5 ರಂದು ಬೋಯಿಂಗ್ನ ಸ್ಟಾರ್ಲೈನ್ ಗಗನನೌಕೆ ಮೂಲಕ ಸುನಿತಾ, ಬುಚ್ ಮತ್ತಿತರ ಗಗನಯಾತ್ರಿಗಳು ಗಗನಯಾನ ಕೈಗೊಂಡಿದ್ದರು. ಎಂಟು ದಿನಗಳ ಬಳಿಕ ಭೂಮಿಗೆ ಮರಳ ಬೇಕಿದ್ದ ಗಗನಯಾನಿಗಳು ನೌಕೆಯಲ್ಲಿ ಉಂಟಾದ ತಾಂತ್ರಿಕ ದೋಷದಿಂದ ಬಾಹ್ಯಾಕಾಶ ನಿಲ್ದಾಣದಲ್ಲೇ ಉಳಿದುಕೊಂಡಿದ್ದರು. ಇದೀಗ ಬರೋಬ್ಬರಿ 8 ತಿಂಗಳ ಬಳಿಕ ಭೂಮಿಗೆ ವಾಪಸಾಗುತ್ತಿದ್ದಾರೆ.
ಸುನಿತಾಗೆ ಕೋಟಿಗಟ್ಟಲೆ ವೇತನ?ನಾಸಾದ ಅತ್ಯುನ್ನತ ಜಿಎಸ್-15 ವೇತನ ಶ್ರೇಣಿ ಹೊಂದಿರುವ ಸರಕಾರಿ ನೌಕರರಾಗಿರುವ ಸುನಿತಾ ವಿಲಿಯಮ್ಸ್ ಹಾಗೂ ಬುಚ್ ವಿಲ್ಮೋರ್ ಅವರು ವಾರ್ಷಿಕ ವೇತನವಾಗಿ 1.08 ಕೋಟಿ ರೂ.ಗಳಿಂದ 1.41 ಕೋಟಿ ರೂ.ವರೆಗೆ ಪಡೆಯುತ್ತಾರೆ. ಆದರೆ, ಸದ್ಯ ಅವರು ಅಂತಾರಾಷ್ಟ್ರೀಯ ಬಾಹ್ಯಾಕಾಶ ಕೇಂದ್ರ (ಐಎಸ್ಎಸ್)ದಲ್ಲಿ ಹೆಚ್ಚುವರಿಯಾಗಿ 9 ತಿಂಗಳು ಕಳೆದಿರುವ ಹಿನ್ನೆಲೆಯಲ್ಲಿ ಸುನಿತಾ, ಬುಚ್ ಅವರಿಗೆ ಹೆಚ್ಚುವರಿಯಾಗಿ ಕೇವಲ 1 ಲಕ್ಷ ರೂ.ವರೆಗೆ (1,148 ಡಾಲರ್) ಪಡೆಯಬಹುದು ಎಂದು ನಾಸಾದ ನಿವೃತ್ತ ಗಗನಯಾತ್ರಿ ಕ್ಯಾಡಿ ಕೋಲ್ಮನ್ ಅವರು ಸ್ಥಳೀಯ ಮಾಧ್ಯಮಕ್ಕೆ ತಿಳಿಸಿದ್ದಾರೆ.ಅಧಿಕ ಅವಧಿ ಕೆಲಸ ಮಾಡಿದ್ದಕ್ಕೆ ಗಗನಯಾತ್ರಿಗಳಿಗೆ ಯಾವುದೇ ವಿಶೇಷ ವೇತನವಿಲ್ಲ ಎಂದು ಅವರು ವಿವರಿಸಿದ್ದಾರೆ. ಇವರು ನಾಸಾದ ಉದ್ಯೋಗಿಗಳಾಗಿರುವುದರಿಂದ ಬಾಹ್ಯಾಕಾಶದಲ್ಲಿ ಅವರ ಸಮಯವನ್ನು ಭೂಮಿಯ ಮೇಲಿನ ನಿಯಮಿತ ಕೆಲಸದ ಅವಧಿಯಂತೆಯೇ ಪರಿಗಣಿಸಲಾಗುತ್ತದೆ ಎಂದು ಅವರು ಹೇಳಿದ್ದಾರೆ.
