ಭಾರತೀಯ ಮೂಲದ ನಾಸಾ ಗಗನಯಾತ್ರಿಸುನಿತಾ ವಿಲಿಯಮ್ಸ್ ಮತ್ತು ಸಹ ಗಗನಯಾತ್ರಿ ಬುಚ್ ವಿಲ್ನೋರ್ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಿಂದ (ISS) ಸುರಕ್ಷಿತವಾಗಿ ಭೂಮಿಗೆ ಮರಳಿದ್ದಾರೆ. ಒಂಬತ್ತು ತಿಂಗಳ ಪ್ರಯತ್ನದ ನಂತರ, ಬುಧವಾರ ಬೆಳಗಿನ ಜಾವ 3.27 ಕ್ಕೆ ಫ್ಲೋರಿಡಾದ ಸಮುದ್ರದ ನೀರಿನಲ್ಲಿ ಸುರಕ್ಷಿತವಾಗಿ ಇಳಿದರು. ಸದ್ಯ ಇಬ್ಬರನ್ನು ಹೂಸ್ಟನ್ ಜಾನ್ಸನ್ ಬಾಹ್ಯಾಕಾಶ ಕೇಂದ್ರಕ್ಕೆ ಸಾಗಿಸಲಾಗಿದ್ದು, ವೈದ್ಯಕೀಯ ಪರೀಕ್ಷೆಗಳಿಗೆ ಒಳಪಡಿಸಿ, ಭೂಮಿಯ ವಾತಾವರಣಕ್ಕೆ ಒಗ್ಗಿಕೊಳ್ಳುವವರೆಗೆ ಅವರಿಗೆ ಸೂಕ್ತ ಚಿಕಿತ್ಸೆಯನ್ನು ಒದಗಿಸಲಾಗುತ್ತದೆ.ಈ ಮೊದಲು ಬಾಹ್ಯಾಕಾಶ ಪ್ರಯಾಣ ಕೇವಲ ಪುರುಷರಿಗೆ ಮಾತ್ರ ಸೀಮಿತಗೊಳಿಸಲಾಗಿತ್ತು. ಹೀಗಾಗಿ ಅದನ್ನು ‘ಪುರುಷ ಮಿಷನ್’ ಎಂದು ಪರಿಗಣಿಸಲಾಗಿತ್ತು.
ಆದರೆ, ಕಾಲ ಕಳೆದಂತೆ ಮಹಿಳೆಯರು ಸಹ ಇದರಲ್ಲಿ ತೊಡಗಿಕೊಂಡರು. ಇದೀಗ ಗಗನಯಾತ್ರಿಗಳಿಗೆ ನೀಡಲಾಗುವ ತರಬೇತಿಯಲ್ಲಿ ಪುರುಷರು ಮತ್ತು ಮಹಿಳೆಯರು ಅನ್ನೋ ಯಾವುದೇ ವ್ಯತ್ಯಾಸವಿಲ್ಲ. ಇಬ್ಬರೂ ಒಂದೇ ರೀತಿಯ ಶಕ್ತಿಯನ್ನು ಹೊಂದಿದ್ದು, ದೈಹಿಕವಾಗಿ ಮತ್ತು ಮಾನಸಿಕವಾಗಿ ಮಹಿಳೆಯರು ಕೂಡ ಪುರುಷರಷ್ಟೇ ಉತ್ತಮರು. ಅದಕ್ಕಾಗಿಯೇ ಈಗ ‘ಮಾನವ ಮಿಷನ್’ ಹೆಸರಿನಲ್ಲಿ ಲಿಂಗ ಸಮಾನತೆ ಕಾಯ್ದುಕೊಳ್ಳಲಾಗಿದೆ.
ಮಾನಸಿಕವಾಗಿ ಮತ್ತು ದೈಹಿಕವಾಗಿ ಬಲಿಷ್ಠರಾಗಿರುವವರನ್ನು ಮಾತ್ರ ಬಾಹ್ಯಾಕಾಶಕ್ಕೆ ಆಯ್ಕೆ ಮಾಡಲಾಗುತ್ತದೆ. ತಾಂತ್ರಿಕ ಸಮಸ್ಯೆಗಳಿಂದ ಹಿಡಿದು ಅಲ್ಲಿನ ಪರಿಸ್ಥಿತಿ ಮತ್ತು ಅನಿರೀಕ್ಷಿತ ಅಡೆತಡೆಗಳನ್ನು ಎದುರಿಸುವವರೆಗೆ ಎಲ್ಲ ತರಬೇತಿಯೂ ತುಂಬಾ ಕಠಿಣವಾಗಿರುತ್ತದೆ. ಗಗನಯಾತ್ರಿಗಳ ಸುರಕ್ಷತೆ ಬಹಳ ಮುಖ್ಯ. ಅದಕ್ಕಾಗಿಯೇ ಮಿಷನ್ ವಿಫಲವಾದರೆ ಬಾಹ್ಯಾಕಾಶ ನೌಕೆಯಿಂದ ಹೇಗೆ ತಪ್ಪಿಸಿಕೊಳ್ಳುವುದು ಎಂಬುದರ ಕುರಿತು ಅವರಿಗೆ ತರಬೇತಿ ನೀಡಲಾಗುತ್ತದೆ. ಇದು ಅವರ ಮಾನಸಿಕ ಮತ್ತು ದೈಹಿಕ ಶಕ್ತಿಯನ್ನು ಅವಲಂಬಿಸಿರುತ್ತದೆ.ಸುನೀತಾ ವಿಲಿಯಮ್ಸ್ ಇವೆಲ್ಲದರಲ್ಲೂ ಪರಿಪೂರ್ಣರು. ಅದಕ್ಕಾಗಿಯೇ ಅವರು ಬಾಹ್ಯಾಕಾಶ ನಿಲ್ದಾಣಕ್ಕೆ ಹೋದರು. ಆದಾಗ್ಯೂ, ಎಂಟು ದಿನಗಳು ಮಾತ್ರ ಉಳಿಯುವ ಮನಸ್ಥಿತಿಯೊಂದಿಗೆ ಹೋದವರು ಒಂಬತ್ತು ತಿಂಗಳುಗಳ ಕಾಲ ಇರಬೇಕಾಯಿತು. ಬಾಹ್ಯಾಕಾಶ ನಿಲ್ದಾಣದಲ್ಲಿ ಸಿಕ್ಕಿಬಿದ್ದ ವಿಲಿಯಮ್ಸ್ ಮತ್ತು ಇನ್ನೊಬ್ಬ ಗಗನಯಾತ್ರಿ ಬುಚ್ ವಿಲೋರ್ ಅವರನ್ನು ನಾಸಾ ಕಾಲಕಾಲಕ್ಕೆ ಮೇಲ್ವಿಚಾರಣೆ ಮಾಡುತ್ತಿತ್ತು.
ಈಜುಕೊಳ, ದ್ರವ ಆಹಾರಕಳೆದ ಒಂಬತ್ತು ತಿಂಗಳಿನಿಂದ ತೂಕವಿಲ್ಲದಿರುವ ಪರಿಸ್ಥಿತಿಗೆ ಒಗ್ಗಿಕೊಂಡಿದ್ದವರು ಈಗ ಇದ್ದಕ್ಕಿದ್ದಂತೆ ಭೂಮಿಯ ವಾತಾವರಣದಲ್ಲಿ ಒಗ್ಗಿಕೊಳ್ಳಲು ಕಷ್ಟವಾಗುತ್ತದೆ. ಅವರ ಮೂಳೆಗಳು ಮತ್ತು ಸ್ನಾಯುಗಳು ದುರ್ಬಲಗೊಂಡಿರುತ್ತವೆ. ಅಲ್ಲದೆ, ದೇಹದ ಕೊಬ್ಬು ಕನಿಷ್ಠ ಮಟ್ಟಕ್ಕೆ ಕಡಿಮೆಯಾಗಿರುತ್ತದೆ. ಭೂಮಿಗೆ ಮರಳಿರುವ ಅವರಿಗೆ ಮೊದಲು ಆರೋಗ್ಯ ಪರೀಕ್ಷೆಗಳನ್ನು ನೀಡಲಾಗುತ್ತದೆ. ಅವರ ಮೂಳೆಗಳು ಮತ್ತು ಸ್ನಾಯುಗಳನ್ನು ಬಲಪಡಿಸಲು ಅವರಿಗೆ ಔಷಧಿಗಳನ್ನು ನೀಡಲಾಗುತ್ತದೆ. ಇಷ್ಟು ವರ್ಷಗಳಿಂದ ತೂಕವಿಲ್ಲದಿರುವಿಕೆಯಿಂದ, ಅವರು ನಿಲ್ಲಲು ಸಾಧ್ಯವಾಗುವುದಿಲ್ಲ. ಅಲ್ಲದೆ, ಕುಳಿತುಕೊಳ್ಳಲು ಕೂಡ ಸಾಧ್ಯವಾಗುವುದಿಲ್ಲ. ಅಷ್ಟೇ ಏಕೆ ಮಲಗಲು ಕೂಡ ಸಾಧ್ಯವಿಲ್ಲ. ಅವರು ತೇಲುವ ಸ್ಥಿತಿಯಲ್ಲಿಯೇ ಇರುತ್ತಾರೆ. ಹೀಗಾಗಿ ಅವರನ್ನು ಬೆಲ್ಟ್ ಧರಿಸಿ ಕೂರಿಸಲಾಗುತ್ತದೆ. ಅದೇ ಬೆಲ್ಟ್ ಸಹಾಯದಿಂದಲೇ ಮಲಗುವಂತೆ ಮಾಡಲಾಗುತ್ತದೆ. ನಿಂತಿರುವಾಗಲೂ ಅವರಿಗೆ ಏನಾದರೂ ಬೆಂಬಲವಾಗಿ ನೀಡಲಾಗುತ್ತದೆ. ಸಾಧ್ಯವಾದಷ್ಟು ಬೇಗ ಈ ಪರಿಸರಕ್ಕೆ ಒಗ್ಗಿಕೊಳ್ಳಲು, ಅವರನ್ನು ಹೆಚ್ಚಿನ ಸಮಯ ಈಜುಕೊಳದಲ್ಲಿ ಇಡಲಾಗುತ್ತದೆ. ಇದು ನೀರಿನಲ್ಲಿ ತೇಲುತ್ತಿರುವಂತೆ ಮತ್ತು ಬಾಹ್ಯಾಕಾಶದಲ್ಲಿರುವಂತೆ ಇರುವುದರಿಂದ, ಅವುಗಳನ್ನು ನಿರ್ವಹಿಸಲು ಸಹಾಯವಾಗುತ್ತದೆ. ಈ ಪ್ರಕ್ರಿಯೆಯು ಸುಮಾರು ಮೂರು ತಿಂಗಳವರೆಗೆ ಇರುತ್ತದೆ. ನಿಧಾನವಾಗಿ ಸಾಮಾನ್ಯ ಸ್ಥಿತಿಗೆ ಮರಳುತ್ತಾರೆ. ಆಹಾರಕ್ಕೂ ಇದೇ ಕ್ರಮವನ್ನು ತೆಗೆದುಕೊಳ್ಳಲಾಗುತ್ತದೆ. ಆರಂಭದಲ್ಲಿ ದ್ರವ ರೂಪದ ಆಹಾರವನ್ನೇ ನೀಡಲಾಗುತ್ತದೆ. ನಂತರದಲ್ಲಿ ಆಹಾರದಲ್ಲೂ ಬದಲಾವಣೆ ಮಾಡಿಕೊಂಡು ಬರಲಾಗುತ್ತದೆ.
