ಬೀದಿ ದೀಪಗಳನ್ನು ಎಲ್‌ಇಡಿಗೆ ಬದಲಾಯಿಸುವುದಾಗಿ ಹಲವು ವರ್ಷಗಳಿಂದ ಬಿಬಿಎಂಪಿ ಹೇಳುತ್ತಿದ್ದರೂ, ಯೋಜನೆ ಆರಂಭವಾಗಿರಲಿಲ್ಲ. ಹೊಸದಾಗಿ ಅಳವಡಿಸುತ್ತಿರುವ ಬೀದಿ ದೀಪಗಳು ಮಾತ್ರ ಎಲ್‌ಇಡಿಯಾಗಿರುತ್ತಿದ್ದವು. ಸುಮಾರು 2.85 ಲಕ್ಷ ಬೀದಿ ದೀಪಗಳು ಇನ್ನೂ ಹಳದಿ ಬೆಳಕು ಚೆಲ್ಲುವ ಸೋಡಿಯಂ ವೇಪರ್ ಲ್ಯಾಂಪ್ (ಎಸ್‌ಎಲ್‌ವಿ)ಗಳಾಗಿವೆ.

ಸಮೀಕ್ಷೆಯಂತೆ, ನಗರದಲ್ಲಿ ಈಗಾಗಲೇ 2.50 ಲಕ್ಷ ಬೀದಿ ದೀಪಗಳಿಗೆ ಎಲ್‌ಇಡಿ ಅಳವಡಿಸಲಾಗಿದೆ. ಉಳಿದ 2.85 ಲಕ್ಷ ಬೀದಿ ದೀಪಗಳನ್ನೂ ಎಸ್‌ಎಲ್‌ವಿಯಿಂದ ಎಲ್‌ಇಡಿಗೆ ಬದಲಾಯಿಸಿದರೆ ಶೇ 50ರಷ್ಟು ವಿದ್ಯುತ್‌ ಉಳಿತಾಯವಾಗಲಿದೆ ಎಂದು ಅಂದಾಜಿಸಲಾಗಿದೆ. ಬಿಬಿಎಂಪಿ ಪ್ರತಿ ತಿಂಗಳು ಸುಮಾರು ₹25 ಕೋಟಿಯಷ್ಟು ವಿದ್ಯುತ್ ಬಿಲ್‌ ಪಾವತಿಸುತ್ತಿದೆ. ಇದು ಅರ್ಧದಷ್ಟಾಗುತ್ತದೆ ಎಂದು ಗುತ್ತಿಗೆದಾರರು ಹೇಳಿದ್ದಾರೆ. ಶೇ 50ರಷ್ಟು ಉಳಿತಾಯವನ್ನು ಸಾಧಿಸಿದರೆ, ಬಿಬಿಎಂಪಿ ಪ್ರತಿ ತಿಂಗಳು ವೆಚ್ಚವನ್ನು ಗುತ್ತಿಗೆದಾರರಿಗೆ ಪಾವತಿಸಲಿದೆ ಎಂದು ಬಿಬಿಎಂಪಿ ಅಧಿಕಾರಿಗಳು ತಿಳಿಸಿದರು.