Income Tax: ಭಾರತದಲ್ಲಿ ಆದಾಯ ತೆರಿಗೆ ವ್ಯವಸ್ಥೆಯಡಿ ನಿಗದಿತ ಆದಾಯದ ಮಿತಿ ಮೀರಿದವರು ತರಿಗೆ ಪಾವತಿಸಬೇಕಾಗುತ್ತದೆ. ಆದಾಯ ತೆರಿಗೆ ಕಾಯ್ದೆಯ ತೆರಿಗೆ ಸ್ಲ್ಯಾಬ್‌ಗಳ ಪ್ರಕಾರ ಹಳೆಯ ಅಥವಾ ಹೊಸ ತೆರಿಗೆ ಪದ್ಧತಿಯಲ್ಲಿ ತೆರಿಗೆ ಪಾವತಿಸಬೇಕಾಗುತ್ತದೆ. ಇದಕ್ಕಾಗಿ ಕಳೆದ ಹಣಕಾಸು ವರ್ಷದ ಆದಾಯದ ಮೇಲೆ ಪ್ರಸ್ತುತ ಹಣಕಾಸು ವರ್ಷ ಅಥವಾ ಮೌಲ್ಯಮಾಪನ ವರ್ಷದಲ್ಲಿ ಐಟಿಆರ್ (ITR) ಸಲ್ಲಿಸಬೇಕಾಗುತ್ತದೆ. ವೈಯಕ್ತಿಕ ತೆರಿಗೆದಾರರಿಗೆ ಮತ್ತು ಆಡಿಟ್ ಅಗತ್ಯವಿಲ್ಲದವರಿಗೆ ಈ ಗಡುವು 2025ರ ಸೆಪ್ಟೆಂಬರ್ 16ಕ್ಕೇ ಮುಕ್ತಾಯವಾಗಿದೆ. ಇದೇ ಸಮಯದಲ್ಲಿ ಕಂಪನಿಗಳು ಕೂಡ ತಮ್ಮ ವಾರ್ಷಿಕ ರಿಟರ್ನ್ಸ್ ಮತ್ತು ಹಣಕಾಸು ವರದಿಗಳನ್ನು (Financial Reports) ಸಲ್ಲಿಸಲು ಗಡುವು ಇರುತ್ತದೆ. ಇದೀಗ ಅದರ ಬಗ್ಗೆ ಕೇಂದ್ರ ಸರ್ಕಾರ ಪ್ರಮುಖ ಪ್ರಕಟಣೆ ನೀಡಿದೆ.

ಕಂಪನಿ ಕಾಯ್ದೆಯಡಿ, 2024-25 ಹಣಕಾಸು ವರ್ಷಕ್ಕೆ ಸಂಬಂಧಿಸಿದಂತೆ ಕಂಪನಿಗಳ ಹಣಕಾಸು ವರದಿಗಳು ಮತ್ತು ವಾರ್ಷಿಕ ರಿಟರ್ನ್‌ಗಳನ್ನು ಸಲ್ಲಿಸುವ ಗಡುವನ್ನು ಮತ್ತೊಮ್ಮೆ ವಿಸ್ತರಿಸುತ್ತಿರುವುದಾಗಿ ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯ ತಿಳಿಸಿದೆ. ಈ ಕುರಿತು ಮಂಗಳವಾರ ಆದೇಶ ಹೊರಡಿಸಲಾಗಿದೆ. ಈ ಹಿಂದೆ ರಿಟರ್ನ್ಸ್ ಸಲ್ಲಿಸಲು 2025ರ ಡಿಸೆಂಬರ್ 31 ಕೊನೆಯ ದಿನವಾಗಿತ್ತು. ಈಗಾಗಲೇ ಒಮ್ಮೆ ವಿಸ್ತರಿಸಲಾಗಿದ್ದ ಈ ಗಡುವನ್ನು ಈಗ ಮತ್ತೆ ಒಂದು ತಿಂಗಳು ಹೆಚ್ಚಿಸಿ, ಜನವರಿ 31 ಕ್ಕೆ ನಿಗದಿಪಡಿಸಲಾಗಿದೆ.

ಫೈಲಿಂಗ್ ವ್ಯವಸ್ಥೆಯಲ್ಲಿ ಕಳೆದ ಕೆಲವು ದಿನಗಳಿಂದ ತಾಂತ್ರಿಕ ಸಮಸ್ಯೆಗಳು ಎದುರಾಗುತ್ತಿದ್ದವು. ಈ ಕಾರಣದಿಂದಾಗಿ ಅನೇಕರು ಗಡುವನ್ನು ವಿಸ್ತರಿಸುವಂತೆ ಮನವಿ ಮಾಡಿದ್ದರು. ವಿವಿಧ ವಲಯಗಳಿಂದ ಬಂದ ಮನವಿಗಳನ್ನು ಪುರಸ್ಕರಿಸಿದ ಸರ್ಕಾರ ಈ ನಿರ್ಧಾರ ಕೈಗೊಂಡಿದೆ. ಈಗ ಕಂಪನಿಗಳು ಯಾವುದೇ ಹೆಚ್ಚುವರಿ ಶುಲ್ಕವಿಲ್ಲದೆ ಜನವರಿ 31 ರವರೆಗೆ ರಿಟರ್ನ್ಸ್ ಸಲ್ಲಿಸಬಹುದು. ಈ ಗಡುವು ವಿಸ್ತರಣೆಯು ಕೇವಲ ಫೈಲಿಂಗ್‌ಗೆ ಮಾತ್ರ ಅನ್ವಯಿಸುತ್ತದೆ. ಆದರೆ, ವಾರ್ಷಿಕ ಸಾಮಾನ್ಯ ಸಭೆ (AGM) ನಡೆಸುವ ಗಡುವು ದಿನಾಂಕಗಳಲ್ಲಿ ಯಾವುದೇ ಬದಲಾವಣೆ ಇಲ್ಲ ಎಂಬುದನ್ನು ನೆನಪಿಡಬೇಕು. ಹೆಚ್ಚಿನ ವಿವರಗಳಿಗಾಗಿ ಅಥವಾ ಫೈಲಿಂಗ್ ಮಾಡಲು MCA ಅಧಿಕೃತ ಪೋರ್ಟಲ್ ಅನ್ನು ಸಂದರ್ಶಿಸಬಹುದು.

ಕಂಪನಿಗಳು ತಮ್ಮ ವಾರ್ಷಿಕ ರಿಟರ್ನ್ಸ್ ಸಲ್ಲಿಸಲು MGT-7, MGT-7A, AOC-4, AOC-4 CFS, AOC-4 NBFC (Ind AS), AOC-4 CFS NBFC (Ind AS), AOC (XBRL) ನಂತಹ ಫಾರ್ಮ್‌ಗಳು ಲಭ್ಯವಿವೆ. ಕಂಪನಿ ಕಾಯ್ದೆ-2013 ರ ಪ್ರಕಾರ, ಪ್ರತಿ ಕಂಪನಿಯು ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯಕ್ಕೆ ತನ್ನ ವಾರ್ಷಿಕ ರಿಟರ್ನ್ಸ್ ಸಲ್ಲಿಸುವುದು ಕಡ್ಡಾಯವಾಗಿದೆ. ಇದರಲ್ಲಿ ಬ್ಯಾಲೆನ್ಸ್ ಶೀಟ್, ಲಾಭ ಮತ್ತು ನಷ್ಟದ ಖಾತೆ ಹಾಗೂ ಕ್ಯಾಶ್ ಫ್ಲೋ ಸ್ಟೇಟ್‌ಮೆಂಟ್‌ಗಳು ಒಳಗೊಂಡಿರುತ್ತವೆ.