ಸ್ಯಾನ್ ಫ್ರಾನ್ಸಿಸ್ಕೋ: ರಸವಿದ್ಯೆಯ ಮೂಲಕ ಚಿನ್ನ ತಯಾರಿಸುವ ಶತಮಾನಗಳ ಕನಸು ಇದೀಗ ವಿಜ್ಞಾನದ ಮೂಲಕ ನನಸಾಗುವ ಲಕ್ಷಣಗಳು ಕಾಣಿಸುತ್ತಿವೆ. ಅಮೆರಿಕದ ‘ಮ್ಯಾರಥಾನ್ ಫ್ಯೂಷನ್’ (Marathon Fusion) ಎಂಬ ನವೋದ್ಯಮ ಕಂಪೆನಿಯು ಪಾದರಸದಿಂದ (Mercury) ನಿಜವಾದ ಚಿನ್ನವನ್ನು ಸೃಷ್ಟಿಸುವಲ್ಲಿ ಗಮನಾರ್ಹ ಯಶಸ್ಸು ಸಾಧಿಸಿರುವುದಾಗಿ ವರದಿಯಾಗಿದೆ.
ವಿಜ್ಞಾನದ ಪವಾಡ ನಡೆದಿದ್ದು ಹೇಗೆ?
ಫ್ಯೂಷನ್ ತಂತ್ರಜ್ಞಾನ: ಕಂಪೆನಿಯು ಫ್ಯೂಷನ್ ರಿಯಾಕ್ಟರ್‌ ಮೂಲಕ ನ್ಯೂಟ್ರಾನ್‌ಗಳನ್ನು ಬಳಸಿ, ‘ಮರ್ಕ್ಯುರಿ-198’ ಐಸೊಟೋಪ್ ಅನ್ನು ‘ಗೋಲ್ಡ್-197’ (ಸ್ಥಿರ ಚಿನ್ನ) ಆಗಿ ಪರಿವರ್ತಿಸುವ ಪರಮಾಣು ಕ್ರಿಯೆಯಲ್ಲಿ ಯಶಸ್ವಿಯಾಗಿದೆ.
10 ಪಟ್ಟು ವೇಗ: 2025 ರಲ್ಲಿ ವಿಶ್ವಪ್ರಸಿದ್ಧ ‘CERN’ ಸಂಸ್ಥೆ ಬರೆದಿದ್ದ ದಾಖಲೆಗಿಂತ 10 ಪಟ್ಟು ಹೆಚ್ಚು ವೇಗವಾಗಿ ಚಿನ್ನ ಉತ್ಪಾದಿಸಿರುವುದಾಗಿ ಕಂಪೆನಿ ಕ್ಲೈಮ್ ಮಾಡಿದೆ.
ಕ್ಯಾನ್ಸರ್ ಚಿಕಿತ್ಸೆಗೆ ಕೊಡುಗೆ: ಈ ತಂತ್ರಜ್ಞಾನ ಕೇವಲ ಚಿನ್ನ ಸೃಷ್ಟಿಗೆ ಮಾತ್ರ ಸೀಮಿತವಾಗಿರದೆ, ಕ್ಯಾನ್ಸರ್ ರೋಗನಿರ್ಣಯ ಹಾಗೂ ಚಿಕಿತ್ಸೆಗೆ ಬಳಸುವ ವಿಕಿರಣಶೀಲ ಐಸೊಟೋಪ್‌ಗಳ ತಯಾರಿಕೆಗೂ ನೆರವಾಗಲಿದೆ.
ಅಗ್ಗದ ಚಿನ್ನ ಸಿಗೋದು ಸುಲಭನಾ?:
ಈ ಹಿಂದೆ CERN ವಿಜ್ಞಾನಿಗಳು 4 ವರ್ಷ ಶ್ರಮಿಸಿ ಅತ್ಯಂತ ಕನಿಷ್ಠ (29 ಪಿಕೋಗ್ರಾಮ್) ಪ್ರಮಾಣದ ಚಿನ್ನ ಉತ್ಪಾದಿಸಿದ್ದರು. ಮ್ಯಾರಥಾನ್ ಫ್ಯೂಷನ್ ಕಂಪೆನಿಯು ಇದನ್ನು 10 ಪಟ್ಟು ವೇಗವಾಗಿ ಮಾಡಿದ್ದೇವೆ ಎಂದಿದ್ದರೂ, ಮಾರುಕಟ್ಟೆಯಲ್ಲಿ ಅಗ್ಗದ ದರದಲ್ಲಿ ವಾಣಿಜ್ಯಿಕವಾಗಿ ಚಿನ್ನ ಸಿಗಲು ಇನ್ನೂ ಸಾಕಷ್ಟು ಸಮಯ ಬೇಕಾಗಬಹುದು.
