ಬೆಳ್ತಂಗಡಿ: ಡಿಜಿಟಲ್ ರಶೀದಿ ನೀಡುವಂತೆ ಆಗ್ರಹಿಸಿ, ಪ್ರವೇಶ ಶುಲ್ಕ ಸಂಗ್ರಹಿಸುತ್ತಿದ್ದ ಅರಣ್ಯ ಇಲಾಖೆಯ ಗುತ್ತಿಗೆ ವಾಚರ್ ಮೇಲೆ 15 ಜನ ಯುವಕರ ಗುಂಪೊಂದು ಹಲ್ಲೆ ನಡೆಸಿ, ಬ್ಯಾಗ್ನಲ್ಲಿದ್ದ 50,500 ರೂ. ನಗದು ದೋಚಿ ಪರಾರಿಯಾಗಿರುವ ಘಟನೆ ಜುಲೈ 19ರಂದು ಬೆಳ್ತಂಗಡಿ ತಾಲೂಕಿನ ದಿಡುಪೆಯಲ್ಲಿ ನಡೆದಿದೆ.
ಘಟನೆಗೆ ಸಂಬಂಧಿಸಿದಂತೆ ಬೆಳ್ತಂಗಡಿ ಪೊಲೀಸ್ ಠಾಣೆಯಲ್ಲಿ ಪ್ರತಾಪ್ ಬನ್ನಲ್ ಹಾಗೂ ಆತನ ಜೊತೆಯಲ್ಲಿದ್ದ ಇತರ ಯುವಕರ ವಿರುದ್ಧ ದೂರು ದಾಖಲಾಗಿದೆ.
ಏನಾಯಿತು ?
ಕುದುರೆಮುಖ ರಾಷ್ಟ್ರೀಯ ಉದ್ಯಾನವನ (ಬೆಳ್ತಂಗಡಿ ವನ್ಯಜೀವಿ ವಲಯ) ವ್ಯಾಪ್ತಿಯ ಮಲವಂತಿಗೆ ಗ್ರಾಮದ ಪ್ರಸಿದ್ಧ ದಿಡುಪೆ ಜಲಪಾತಕ್ಕೆ ಬರುವ ಪ್ರವಾಸಿಗರಿಂದ ಪ್ರವೇಶ ಶುಲ್ಕ ಸಂಗ್ರಹಿಸುವ ಕರ್ತವ್ಯದಲ್ಲಿ ಗುತ್ತಿಗೆ ಆಧಾರಿತ ವಾಚರ್ ಗೋಪಾಲ (42) ನಿರತರಾಗಿದ್ದರು.
ಪ್ರವೇಶ ಪಡೆದ ಯುವಕರು: ಮಧ್ಯಾಹ್ನ ಸುಮಾರು 12:55ರ ವೇಳೆಗೆ 15 ಯುವಕರ ಗುಂಪು ಜಲಪಾತ ವೀಕ್ಷಣೆಗೆ ಆಗಮಿಸಿದೆ. ಎಲ್ಲರೂ ವಯಸ್ಕರಾಗಿದ್ದ ಕಾರಣ ನಿಯಮದಂತೆ ತಲಾ 200 ರೂ.ನಂತೆ ಒಟ್ಟು 3,000 ರೂ. ಶುಲ್ಕ ಪಡೆಯಲಾಗಿತ್ತು.
ಕೈಬರಹದ ರಶೀದಿ: ಪ್ರತಾಪ್ ಬನ್ಮಲ್ ಎಂಬಾತನ ಗುರುತಿನ ಚೀಟಿ ಪಡೆದು, ವಿವರಗಳನ್ನು ನೋಂದಣಿ ಪುಸ್ತಕದಲ್ಲಿ ದಾಖಲಿಸಿಕೊಂಡ ವಾಚರ್ ಗೋಪಾಲ, ಶುಲ್ಕಕ್ಕೆ ಪ್ರತಿಯಾಗಿ ಕೈಬರಹದ ರಶೀದಿ ನೀಡಿ ಪ್ರವೇಶಕ್ಕೆ ಅವಕಾಶ ಮಾಡಿಕೊಟ್ಟಿದ್ದರು.
ಊಟದ ಸಮಯ ನೋಡಿ ಗಲಾಟೆ!
ಮಧ್ಯಾಹ್ನ 1:40ರ ವೇಳೆಗೆ ಬೀಟ್ ಫಾರೆಸ್ಟ್ ಅಧಿಕಾರಿ ಭರತ್ ಅವರು ಊಟಕ್ಕೆ ತೆರಳಿದ್ದನ್ನೇ ಕಾಯುತ್ತಿದ್ದ ಯುವಕರ ಗುಂಪು, ವಾಪಸ್ ಬಂದು “ನಮಗೆ ಡಿಜಿಟಲ್ ರಶೀದಿಯೇ ಬೇಕು” ಎಂದು ತಕರಾರು ತೆಗೆದಿದೆ. “ಡಿಜಿಟಲ್ ರಶೀದಿ ಯಂತ್ರ ತಾಂತ್ರಿಕ ಸಮಸ್ಯೆಯಿಂದ ಹಾಳಾಗಿದೆ” ಎಂದು ವಾಚರ್ ಎಷ್ಟೇ ವಿನಂತಿಸಿಕೊಂಡರೂ ಕೇಳದೆ ಯುವಕರು ಗಲಾಟೆ ಆರಂಭಿಸಿದ್ದಾರೆ.ಈ ವೇಳೆ ಪ್ರತಾಪ್ ಬನ್ಮಲ್ ಎಂಬಾತ ಗೋಪಾಲ ಅವರನ್ನು ತಡೆದು ನಿಲ್ಲಿಸಿ, “ಕೂಡಲೇ ನಮ್ಮ ಹಣ ವಾಪಸ್ ನೀಡು” ಎಂದು ಬೆದರಿಕೆ ಹಾಕಿ ಕೈಯಿಂದ ಹಲ್ಲೆ ನಡೆಸಿದ್ದಾನೆ. ತಕ್ಷಣವೇ ಇತರ ಯುವಕರು ಸೇರಿಕೊಂಡು, ಗೋಪಾಲ ಅವರ ಬಳಿ ಇಲಾಖೆಯ ಪ್ರವೇಶ ಶುಲ್ಕ ಸಂಗ್ರಹದ ಒಟ್ಟು 50,500 ರೂ. ನಗದು ಇರಿಸಲಾಗಿದ್ದ ಬ್ಯಾಗ್ ಕಿತ್ತುಕೊಂಡು ಸ್ಥಳದಿಂದ ಪರಾರಿಯಾಗಿದ್ದಾರೆ.
