ಪಾಲಕ್ಕಾಡ್: ರಾಜ್ಯ ಸಾರಿಗೆ ಬಸ್ಸುಗಳಲ್ಲಿ ಮಹಿಳೆಯರಿಗೆ ಉಚಿತ ಪ್ರಯಾಣದ ಅವಕಾಶ ನೀಡುವ ಕೇರಳದ ನೂತನ ಯುಡಿಎಫ್ ಸರ್ಕಾರದ ನಿರ್ಧಾರ ಮರುಪರಿಶೀಲನೆಗೆ ಖಾಸಗಿ ಬಸ್ ಮಾಲಿಕರ ಸಂಘಟನೆ ಸೋಮವಾರ ಒತ್ತಾಯಿಸಿದೆ.
ಈ ನಿರ್ಧಾರವು ರಾಜ್ಯದ ಸಾರ್ವಜನಿಕ ಸಾರಿಗೆ ಜಾಲ ಅಸ್ಥಿರಗೊಳಿಸಬಹುದು, ಲಕ್ಷಾಂತರ ಖಾಸಗಿ ಬಸ್ ಉದ್ಯೋಗಿಗಳ ಜೀವನೋಪಾಯಕ್ಕೆ ಧಕ್ಕೆಯಾಗಬಹುದು ಎಂದು ‘ಆಲ್ ಕೇರಳ ಬಸ್ ಆಪರೇಟರ್ಸ್ ಆರ್ಗನೈಸೇಶನ್’ ಹೇಳಿದೆ. ಪ್ರಸ್ತಾವಿತ ಯೋಜನೆಯ ಪರಿಣಾಮ ಸರಿದೂಗಿಸಲು ಖಾಸಗಿ ಬಸ್ ವಲಯಕ್ಕೆ ವಿಶೇಷ ಪ್ಯಾಕೇಜ್ ಘೋಷಿಸುವಂತೆ ಸರ್ಕಾರಕ್ಕೆ ಸಂಘಟನೆಯು ಒತ್ತಾಯಿಸಿದೆ.
