ಫ್ಲೋರಿಡಾ: ನೈಸರ್ಗಿಕ ವಿಕೋಪಗಳೆಂದರೆ ಸಾಮಾನ್ಯ ಎಂಬಂತೆ ವರ್ತಿಸುವ ಅಮೆರಿಕ, ಈಗ ಎರಿನ್ ಎಂಬ ಭಯಾನಕ ಚಂಡಮಾರುತವನ್ನು ಸ್ವಾಗತಿಸಿದೆ. ಇಂದು (ಆ.17-ಭಾನುವಾರ) ಎರಿನ್ ಚಂಡಮಾರುತವು ಪೋರ್ಟೊ ರಿಕೊದಿಂದ ಸುಮಾರು 150 ಮೈಲುಗಳಷ್ಟು ಉತ್ತರಕ್ಕೆ ಚಲಿಸುತ್ತಿದ್ದು, ಗಂಟೆಗೆ 14 ಮೈಲುಗಳ ವೇಗದಲ್ಲಿ ಪಶ್ಚಿಮ-ವಾಯುವ್ಯ ದಿಕ್ಕಿನತ್ತ ತಿರುಗುತ್ತಿದೆ.
ಚಂಡಮಾರುತದ ಕಾರಣಕ್ಕೆ ಭಾರೀ ಮಳೆ ಮತ್ತು ಗಾಳಿ ಈಗಾಗಲೇ ಪೋರ್ಟೊ ರಿಕೊ ಮತ್ತು ವರ್ಜಿನ್ ದ್ವೀಪಗಳಿಗೆ ಅಪ್ಪಳಿಸಿದೆ. ಬಿರುಗಾಳಿ ಮತ್ತು ಭಾರೀ ಮಳೆಯ ಕಾರಣಕ್ಕೆ ಟರ್ಕ್ಸ್ ಮತ್ತು ಕೈಕೋಸ್ ದ್ವೀಪಗಳಿಗೆ ಉಷ್ಣವಲಯದ ಚಂಡಮಾರುತದ ಎಚ್ಚರಿಕೆ ಜಾರಿ ಮಾಡಲಾಗಿದೆ.ಅದೇ ರೀತಿ ಆಗ್ನೇಯ ಬಹಾಮಾಸ್ಗೂ ಎಚ್ಚರಿಕೆಯ ಸಂದೇಶ ಕಳುಹಿಸಲಾಗಿದೆ.
ಭಾನುವಾರ ತಡರಾತ್ರಿಯಿಂದ ಸೋಮವಾರದವರೆಗೆ ಟರ್ಕ್ಸ್ ಮತ್ತು ಕೈಕೋಸ್ ದ್ವೀಪಗಳು ಮತ್ತು ಆಗ್ನೇಯ ಬಹಾಮಾಸ್ನ ಪೂರ್ವಕ್ಕೆ ,ಎರಿನ್ ಚಂಡಮಾರುತ ಹಾದುಹೋಗುವ ನಿರೀಕ್ಷೆಯಿದೆ. ಮಂಗಳವಾರ ಚಂಡಮಾರುತವು ಕ್ರಮೇಣ ಉತ್ತರಕ್ಕೆ ತಿರುವು ಪಡೆಯುವ ನಿರೀಕ್ಷೆ ಇದ್ದು,ಎರಿನ್ ಫ್ಲೋರಿಡಾ ಅಥವಾ ಆಗ್ನೇಯ ಅಮೆರಿಕಕ್ಕೆ ಪ್ರವೇಶಿಸುವ ಸಾಧ್ಯತೆ ಕಡಿಮೆ ಎಂದು ಹೇಳಲಾಗಿದೆ. 2024ರಲ್ಲಿ ಫ್ಲೋರಿಡಾದ ಕರಾವಳಿಗೆ ಭೀಕರ ಮಿಲ್ಟನ್ ಚಂಡಮಾರುತ ಅಪ್ಪಳಿಸಿತ್ತು.
ವಾರದ ಮಧ್ಯಭಾಗದ ವೇಳೆಗೆ, ಚಂಡಮಾರುತವು ಬರ್ಮುಡಾ ಮತ್ತು ಅಮೆರಿಕದ ಪೂರ್ವ ಕರಾವಳಿಯ ನಡುವೆ ನೆಲೆಗೊಳ್ಳುವ ಮುನ್ಸೂಚನೆ ಇದೆ. ಚಂಡಮಾರುತದ ಕೇಂದ್ರವು ಕಡಲಾಚೆಯಲ್ಲಿದ್ದರೂ ಸಹ, ಅದರ ವಿಸ್ತರಿಸುತ್ತಿರುವ ಗಾಳಿಯ ಕ್ಷೇತ್ರದಿಂದಾಗಿ ಅದರ ಪರಿಣಾಮಗಳು ವಿಶಾಲ ಪ್ರದೇಶದಲ್ಲಿ ವಿಸ್ತರಿಸಲಿರುವುದು ಖಚಿತ.
ಚಂಡಮಾರುತದ ಪರಿಣಾಮ ಬಲವಾದ ಗಾಳಿಯು ಪ್ರಸ್ತುತ ಕೇಂದ್ರದಿಂದ 25 ಮೈಲುಗಳವರೆಗೆ ಹೊರಕ್ಕೆ ವಿಸ್ತರಿಸುತ್ತಿದೆ. ಆದರೆ ಉಷ್ಣವಲಯದ ಚಂಡಮಾರುತ-ಬಲದ ಗಾಳಿಯು ಸುಮಾರು 205 ಮೈಲುಗಳನ್ನು ತಲುಪಲಿದೆ ಎಂದು ಅಮೆರಿಕನ್ ಮಾಧ್ಯಮಗಳು ವರದಿ ಮಾಡಿವೆ. 2024ರಲ್ಲಿ ಫ್ಲೋರಿಡಾ ಕಡಲ ತೀರಕ್ಕೆ ಡೆಬ್ಬಿ ಚಂಡಮಾರುತ ಅಪ್ಪಳಿಸಿತ್ತು.
ಫ್ಲೋರಿಡಾದಲ್ಲಿ ಎರಿನ್ ಚಂಡಮಾರುತದ ಪ್ರಭಾವ ಕಡಿಮೆ ಎಂದು ಹೇಳಲಾಗಿದ್ದರೂ, ಸ್ಥಳೀಯ ನಿವಾಸಿಗಳು ಮತ್ತು ಸಂದರ್ಶಕರು ಎಚ್ಚರಿಕೆಯಿಂದ ಇರುವಂತೆ ಸ್ಥಳೀಯ ಆಡಳಿತ ಸೂಚಿಸಿದೆ. ಜಾಕ್ಸನ್ವಿಲ್ಲೆಯಲ್ಲಿರುವ ರಾಷ್ಟ್ರೀಯ ಹವಾಮಾನ ಸೇವೆಯು, ಆಗಸ್ಟ್ 18 ಮತ್ತು ಆಗಸ್ಟ್ 21ರ ನಡುವೆ ಫ್ಲೋರಿಡಾ ಕರಾವಳಿಯಲ್ಲಿ ಅಪಾಯಕಾರಿ ರಿಪ್ ಕರೆಂಟ್ಗಳು ಕಾಣುವ ಸಾಧ್ಯತೆ ಇದೆ ಎಂದು ತಿಳಿಸಿದೆ. ಅಲ್ಲದೇ ಆಗಸ್ಟ್ 19 ಮತ್ತು ಆಗಸ್ಟ್ 20ರಂದು ಏಳು ಅಡಿಗಿಂತ ಹೆಚ್ಚಿನ ಅಲೆಗಳ ಎಚ್ಚರಿಕೆ ನೀಡಲಾಗಿದ್ದು, ಸರ್ಫಿಂಗ್ ನಿಷೇಧಿಸಲಾಗಿದೆ.
ಫ್ಲೋರಿಡಾದ ಆಚೆ ಅಪಾಯಕಾರಿ ರಿಪ್ ಕರೆಂಟ್ಗಳು ಮುಂಬರುವ ದಿನಗಳಲ್ಲಿ ಬಹಾಮಾಸ್, ಬರ್ಮುಡಾ, ಯುಎಸ್ ಪೂರ್ವ ಕರಾವಳಿಯ ಬಹುಪಾಲು ಮತ್ತು ಅಟ್ಲಾಂಟಿಕ್ ಕೆನಡಾದ ಮೇಲೆ ಪರಿಣಾಮ ಬೀರುತ್ತವೆ ಎಂದು ಸಿಎನ್ಎನ್ ವರದಿ ಎಚ್ಚರಿಸಿದೆ. 2021ರಲ್ಲಿ ನ್ಯೂಯಾರ್ಕ್ಗೆ ಇಡಾ ಚಂಡಮಾರುತ ಅಪ್ಪಳಿಸಿತ್ತು.ಉಷ್ಣವಲಯದ ಎರಿನ್ ಚಂಡಮಾರುತವನ್ನು 24 ಗಂಟೆಗಳಲ್ಲಿ ಕ್ಲಾಸ್ 5 ಚಂಡಮಾರುತ ಎಂದು ಪರಿಗಣಿಸಲಾಗಿದೆ. ಹವಾಮಾನಶಾಸ್ತ್ರಜ್ಞರ ಪ್ರಕಾರ ಇದುವರೆಗೂ ಕೇವಲ 43 ಅಟ್ಲಾಂಟಿಕ್ ಚಂಡಮಾರುತಗಳು ದಾಖಲೆಯ ಕ್ಲಾಸ್ 5ರ ಶಕ್ತಿಯನ್ನು ತಲುಪಿವೆ. ಎರಿನ್ ಚಂಡಮಾರುತ ಈ ಪೈಕಿ ಒಂದಾಗಿದ್ದು, ರಕ್ಷಣಾ ಕಾರ್ಯಾಚರಣೆ ಪಡೆಗಳನ್ನು ಸರ್ವಸನ್ನದ್ಧುಗೊಳಿಸಲಾಗಿದೆ.
