ಗುರುವಾಯೂರು: ಕೇರಳದ ಪ್ರಸಿದ್ದ ಗುರುವಾಯೂರು ಶ್ರೀ ಕೃಷ್ಣ ದೇಗುಲದಲ್ಲಿ ಭಾನುವಾರ ಕೇವಲ ಏಳು ಗಂಟೆಗಳಲ್ಲಿ ದಾಖಲೆಯ 416 ಮದುವೆಗಳು ನಡೆದಿವೆ. ಇದು ದೇಗುಲದಲ್ಲಿ ಒಂದೇ ದಿನ ನಡೆದ ಅತ್ಯಧಿಕ ಮದುವೆಗಳ ಸಂಖ್ಯೆಯಾಗಿದೆ ಎಂದು ದೇವಸ್ವಂ ಅಧಿಕಾರಿಗಳು ತಿಳಿಸಿದ್ದಾರೆ.ಸ್ಪಾಟ್ ಬುಕ್ಕಿಂಗ್ ಸೇರಿದಂತೆ ಒಟ್ಟು 442 ವಿವಾಹಗಳು ನಿಗದಿಯಾಗಿದ್ದವು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಮಲಯಾಳಂ ತಿಂಗಳಾದ ‘ಚಿಂಗಂ’ ಮಾಸದ ಮೊದಲ ಭಾನುವಾರವನ್ನು ಇಲ್ಲಿ ಮದುವೆಗಳಿಗೆ ಅತ್ಯಂತ ಮಂಗಳಕರವೆಂದು ಪರಿಗಣಿಸಲಾಗುತ್ತದೆ. ಈ ಕಾರಣದಿಂದಾಗಿ ಈ ಮಾಸದಲ್ಲಿ ಭಾರಿ ಸಂಖ್ಯೆಯಲ್ಲಿ ವಿವಾಹಗಳು ನಡೆಯುತ್ತವೆ.

ದೇವಸ್ಥಾನದ ಪ್ರಾಂಗಣದಲ್ಲಿ ಒಟ್ಟು 6 ಮಂಟಪಗಳನ್ನು ಸಿದ್ಧಪಡಿಸಲಾಗಿದ್ದು, ಮುಂಜಾನೆ 4.10 ರಿಂದ ಮಧ್ಯಾಹ್ನ 12.45 ರವರೆಗೆ (ಉಷಾಪೂಜೆ ಮತ್ತು ಪಂತೀರಾಡಿ ಪೂಜೆಗಾಗಿ ದೇವಸ್ಥಾನ ಮುಚ್ಚಿದ ಸಮಯವನ್ನು ಹೊರತುಪಡಿಸಿ) ಪ್ರತಿ ಗಂಟೆಗೆ 60ಕ್ಕೂ ಹೆಚ್ಚು ಮದುವೆಗಳು ನಡೆದವು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.ದೇವಸ್ವಂ ಫೇಸ್‌ಬುಕ್ ಪೋಸ್ಟ್ ಪ್ರಕಾರ, ಈ ಹಿಂದೆ 2024ರ ಸೆ.8ರಂದು 334 ಮದುವೆಗಳು ನಡೆದಿದ್ದೇ ಇದುವರೆಗಿನ ದಾಖಲೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.