ಬೆಂಗಳೂರು: ರಾಜ್ಯದಲ್ಲಿ ಅಗತ್ಯ ವಸ್ತುಗಳ ದರ ಏರಿಕೆಯ ನಡುವೆಯೇ ಸಾರ್ವಜನಿಕರಿಗೆ ಮತ್ತೊಂದು ಆಘಾತ ಎದುರಾಗಿದೆ. ಕಳೆದ ನಾಲ್ಕು ತಿಂಗಳಲ್ಲಿ 4ನೇ ಬಾರಿಗೆ ಅಕ್ಕಿ ದರ (Karnataka Rice Price Hike) ಭಾರಿ ಪ್ರಮಾಣದಲ್ಲಿ ಏರಿಕೆಯಾಗಿದ್ದು, ಗ್ರಾಹಕರು ಬೆಲೆ ಕೇಳಿ ಬೆಚ್ಚಿಬೀಳುವಂತಾಗಿದೆ.ಸೋನಾ ಮಸೂರಿ ಚೀಲಕ್ಕೆ ₹390-400 ಏರಿಕೆ:ಯಶವಂತಪುರ ಸಗಟು ಮಾರುಕಟ್ಟೆಯಲ್ಲಿ 25 ಕೆ.ಜಿ. ಸೋನಾ ಮಸೂರಿ ಅಕ್ಕಿ ಚೀಲದ ದರ ₹1,430 ರಿಂದ ₹1,820 ಕ್ಕೆ ಹೆಚ್ಚಾಗಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಕೆ.ಜಿ. ಸೋನಾ ಮಸೂರಿ ದರ ₹90 ರಿಂದ ₹100 ರ ಸಮೀಪಕ್ಕೆ ತಲುಪಿದೆ.
ವಿವಿಧ ತಳಿಯ ಅಕ್ಕಿ ದರಗಳ ವಿವರ (ಕೆ.ಜಿ.ಗೆ):
ಸೋನಾ ಮಸೂರಿ: ₹100 ರ ಗಡಿ ಸಮೀಪ (25 ಕೆಜಿ ಚೀಲಕ್ಕೆ ₹1,820)
ರಾಜಮುಡಿ ಅಕ್ಕಿ: ₹125 ರಿಂದ ₹150
ಜೀರಾ ರೈಸ್: ₹115 ರಿಂದ ₹125
ಬಾಸುಮತಿ ಅಕ್ಕಿ: ₹105 ರಿಂದ ₹120
ಕೋಲಂ ಅಕ್ಕಿ: ₹75 ರಿಂದ ₹110
ಸ್ಟೀಮ್ ಅಕ್ಕಿ: ₹60 ರಿಂದ ₹88
ಬೆಲೆ ಏರಿಕೆಗೆ ಪ್ರಮುಖ ಕಾರಣಗಳು:ಮುಂಗಾರು ಮಳೆ ಕೈಕೊಟ್ಟ ಪರಿಣಾಮ ರಾಯಚೂರು, ಸಿಂಧನೂರು, ಸಿರಗುಪ್ಪ ಹಾಗೂ ಭದ್ರಾವತಿ ಭಾಗಗಳಲ್ಲಿ ಭತ್ತದ ಉತ್ಪಾದನೆ ಕ್ಷೀಣಿಸಿದೆ. ಇದರ ಜೊತೆಗೆ ನೆರೆಯ ಆಂಧ್ರಪ್ರದೇಶ ಹಾಗೂ ತಮಿಳುನಾಡಿನಲ್ಲೂ ಅಕ್ಕಿ ಇಳುವರಿ ಶೇ.50ರಷ್ಟು ಕಡಿಮೆಯಾಗಿದ್ದು, ಪೂರೈಕೆಯ ಕೊರತೆಯೇ ಈ ಬೆಲೆ ಏರಿಕೆಗೆ ಮುಖ್ಯ ಕಾರಣವಾಗಿದೆ. ಮುಂಬರುವ ದಿನಗಳಲ್ಲಿ ದರ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ವ್ಯಾಪಾರಿಗಳು ಎಚ್ಚರಿಸಿದ್ದಾರೆ.
