ತುಮಕೂರು: ತಿಪಟೂರು ಮಾರುಕಟ್ಟೆಯಲ್ಲಿ ಗುರುವಾರ ಕ್ವಿಂಟಾಲ್ ಕೊಬ್ಬರಿ ಬರೋಬ್ಬರಿ 21,809 ರೂ. ಗೆ ಮಾರಾಟವಾಗಿ ಸಾರ್ವಕಾಲಿಕ ದಾಖಲೆ ಬರೆದಿದೆ. ಮೇ 12ರಂದು 18,244ರೂ.ಗೆ ಮಾರಾಟವಾಗಿದ್ದ ಕೊಬ್ಬರಿ 15 ದಿನಗಳ ಅಂತರದಲ್ಲೇ 21,809ರೂ.ಗೆ ತಲುಪಿದೆ. ಗುರುವಾರ ಮಾರುಕಟ್ಟೆಗೆ 2,613 ಕ್ವಿಂಟಾಲ್ ಕೊಬ್ಬರಿ ಬಂದಿದ್ದು, ಸರಾಸರಿ 20,500 ರೂ. ನಂತೆ ಮಾರಾಟವಾಗಿದೆ. ಕನಿಷ್ಠ ದರ 20000,
ಗರಿಷ್ಠ 21,809ರೂ. ದಾಖಲಾಗಿರುವುದು ತೆಂಗು ಸೀಮೆಯಲ್ಲಿ ಅಚ್ಚರಿ ಮೂಡಿಸಿದೆ. ತಮಿಳುನಾಡು ಜತೆಗೆ ಉತ್ತರ ಭಾರತ ಭಾಗದಲ್ಲೂ ತಿಪಟೂರು ಕೊಬ್ಬರಿಗೆ ಬೇಡಿಕೆ ಹೆಚ್ಚಾಗಿದೆ. ಇಳುವರಿ ಕುಂಠಿತವಾಗಿರುವ ಕಾರಣಕ್ಕೆ ಪೂರೈಕೆ ಕಡಿಮೆ ಯಾಗಿರುವುದು, ಮಾರುಕಟ್ಟೆಯಲ್ಲಿ ಇತ್ತೀಚೆಗೆ ತಂದಿರುವ ಕ್ರಾಂತಿಕಾರಕ ನಿರ್ಧಾರ ಬೆಲೆ ಹೆಚ್ಚಳಕ್ಕೆ ಕಾರಣವಾಗಿವೆ. ಕೊಬ್ಬರಿ ಬೆಲೆ ಹೆಚ್ಚಳದ ಬೆನ್ನಲ್ಲೇ ತೆಂಗಿನಕಾಯಿ ಬೆಲೆ 50 ರೂ. ದಾಟಿದೆ.
