ಕರಾವಳಿಯಲ್ಲಿ ಮಳೆ ಜೋರಾಗಿದ್ದು,ಕಡಲ ಅಲೆಗಳ ಅಬ್ಬರ ಬಿರುಸುಗೊಂಡಿದೆ. ಮಲ್ಪೆ ಕಡಲತೀರದಲ್ಲಿ ಇನ್ನು ಮೂರು ತಿಂಗಳು ಪ್ರವಾಸಿಗರು ಬಂದರೂ ದೂರದಲ್ಲೇ ನಿಂತು ಆಸ್ವಾದಿಸಬೇಕೇ ಹೊರತು ನೀರಿಗೆ ಇಳಿದು ಮೋಜು, ಮಸ್ತಿ ಮಾಡುವಂತಿಲ್ಲ. ಗಾಳಿ, ಮುಂಗಾರಿನ ಹಿನ್ನೆಲೆಯಲ್ಲಿ ಮಲ್ಪೆ ಕಡಲತೀರದಲ್ಲಿ ಅಲೆಗಳ ಅಬ್ಬರ ಬಿರುಸುಗೊಂಡಿದ್ದು, ಮುನ್ನೆಚ್ಚರಿಕೆ ಕ್ರಮಕ್ಕಾಗಿ ನೀರಿಗಿಳಿಯುವುದಕ್ಕೆ ನಿಷೇಧ ಹೇರಲಾಗಿದೆ.ಮಲ್ಪೆ ಕಡಲ ಕಿನಾರೆಯ ಸೌಂದರ್ಯವನ್ನು ಸವಿಯಲು ದಿನನಿತ್ಯ ಸಾವಿರಾರು ಪ್ರವಾಸಿಗರು ಆಗಮಿಸುತ್ತಾರೆ. ಸಮುದ್ರ ಪ್ರಕ್ಷುಬ್ಧಗೊಂಡು ಅಲೆಗಳ ಅಬ್ಬರ ಜೋರಿದ್ದರೂ ಜೀವರಕ್ಷಕ ದಳದ ಕಣ್ಣು ತಪ್ಪಿಸಿ ನೀರಿಗಿಳಿದು ಅನಾಹುತ ಸಂಭವಿಸುವುದು ಸಾಮಾನ್ಯ. ಬೀಚ್ ಸಿಬ್ಬಂದಿಗೆ ಪ್ರವಾಸಿಗರನ್ನು ತಡೆಯುವುದೇ ದೊಡ್ಡ ಕೆಲಸ. ಇದಕ್ಕೆ ಕಡಿವಾಣ ಹಾಕಲು 1 ಕಿ.ಮೀ. ದೂರ ತಡೆಬೇಲಿ ನಿರ್ಮಾಣಗೊಂಡಿದೆ. ಗುರುವಾರದಿಂದ ಕೆಲಸ ಆರಂಭಗೊಂಡಿದ್ದು, ಶನಿವಾರ ಪೂರ್ಣಗೊಂಡಿದೆ.ಸಮುದ್ರತೀರದಿಂದ ಸುಮಾರು 20 ಅಡಿಗಳಷ್ಟು ದೂರ, ಒಂದು ಕಿ.ಮೀ. ಬೀಚ್ನ ಉದ್ದಕ್ಕೂ 10ಅಡಿ ಎತ್ತರದಲ್ಲಿ ಫಿಶ್ನೆಟ್ ಬಳಸಿ ತಡೆಬೇಲಿಯನ್ನು ಹಾಕಲಾಗಿದೆ. ತಡೆಬೇಲಿಯ ಉದ್ದಕ್ಕೂ ಕಂಬಗಳಲ್ಲಿ ಕೆಂಪು ಬಾವುಟವನ್ನು ಎಲ್ಲರಿಗೆ ಗೋಚರಿಸುವಂತೆ ಕಟ್ಟಲಾಗಿದೆ. ನೀರಿಗಿಳಿಯದಂತೆ ಕನ್ನಡ ಮತ್ತು ಇಂಗ್ಲಿಷ್ನಲ್ಲಿ ಬರೆಯಲಾಗಿದೆ. ಸಮುದ್ರದ ವಾತಾವರಣವನ್ನು ನೋಡಿಕೊಂಡು ಸೆಪ್ಟಂಬರ್ ಆರಂಭದಲ್ಲಿ ತಡೆಬೇಲಿ ತೆರವುಗೊಳಿಸಲಾಗುತ್ತದೆ. ಆ ಬಳಿಕ ಸಮುದ್ರಕ್ಕೆ ಇಳಿಯಬಹುದಾಗಿದೆ ಎಂದು ಪ್ರವಾಸೋದ್ಯಮ ಇಲಾಖೆ ತಿಳಿಸಿದೆ.
